قاڭتار وقيعاسىندا قانشا ادام زارداپ شەكتى؟
قاڭتار وقيعالارىندا وق تيگەن 2 بالا ءولىپ، 7-ەۋى جاراقات الدى. بۇل تۋرالى ق ر دسم مەديسينالىق جانە فارماسيەۆتيكالىق باقىلاۋ كوميتەتىنىڭ ءتوراعاسى باۋىرجان بايسەركين ايتتى، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.
«توتەنشە جاعداي كەزەڭىندە مەديسينالىق ۇيىمدارعا 2 740 زارداپ شەككەن ادام كومەك الۋعا جۇگىندى. ولاردىڭ ىشىندە 1 843 ادام امبۋلاتورلىق كومەك الىپ، 897 ادام اۋرۋحاناعا جاتقىزىلدى. ونىڭ ىشىندە 188 ادام رەانيماسيالىق بولىمشەدە بولدى. بۇگىندە 891 پاسيەنت جازىلىپ شىقتى»، - دەدى باۋىرجان بايسەركين ورتالىق كوممۋنيكاسيالار قىزمەتىندەگى باسپا ءسوز ءماسليحاتى بارىسىندا.
ونىڭ اتاپ وتۋىنشە، 177 ادام مەديسينالىق ۇيىمداردا ومىردەن وزدى.
«قازىرگى ۋاقىتتا 6 ادام، الماتى مەن قىزىلوردادا 3 ادامنان ستاسيونارلاردا ەم الىپ جاتىر. ولاردىڭ ءبىرىنىڭ جاعدايى اۋىر، وق تيگەن. ەم الۋدا. ەلىمىزدىڭ ءۇش وڭىرىندە كامەلەتكە تولماعان بالالار زارداپ شەكتى. الماتىدا 2 بالا وق ءتيىپ قازا تاپتى. 7 بالا ءتۇرلى وق جاراقاتىمەن اۋرۋحانا ءتۇستى. ولاردىڭ 4-ەۋى – الماتىدا، ەكەۋى – الماتى وبلىسىندا جانە بىرەۋى – جامبىل وبلىسىندا. سونىمەن قاتار الماتى وبلىسىندا ءبىر جۇكتى ايەل شاشىلعان گازدان زارداپ شەكتى»، - دەدى باۋىرجان بايسەركين.