سوت ۇكىمى زاڭدى كۇشىنە ەنگەن جوق.
ولار سوت الدىندا يزولياتورعا قامالعان "كۇدىكتىنى" ءولتىرىپ قويعانى ءۇشىن جاۋاپ بەردى دەپ حابارلايدى Almaty-akshamy.kz
تالدىقورعان قالالىق سوتىنىڭ باسپا ءسوز قىزمەتى حابارلاعانداي، قاڭتار وقيعاسىندا يزولياتورعا قامالعان "كۇدىكتىنى" ءولتىرىپ العان پوليسەي 10 جىلعا سوتتالدى، ال ونىڭ وسى فاكتىنى جاسىرعان ارىپتەسى 4 جىلعا باس بوستاندىعىنان ايىرىلدى.
انىقتالعانداي، 2022 جىلدىڭ 8 قاڭتارىندا پوليسيا باسقارماسىنىڭ قىزمەتكەرلەرى "جاپپاي تارتىپسىزدىكتەرگە قاتىسقان" دەگەن كۇدىكپەن جابىرلەنۋشى م.-نى ۋاقىتشا ۇستاۋ يزولياتورىنا (ۋۇي) جەتكىزگەن. ۋۇي عيماراتىندا ءوزىنىڭ قىزمەتتىك مىندەتتەرىن اتقارعان سوتتالۋشى ب. جابىرلەنۋشىگە جاراقات كەلتىرىپ، ول اۋرۋحانادا قايتىس بولعان. ەكىنشى سوتتالۋشى س. وسى اۋىر قىلمىس فاكتىسىن جاسىرعان.
سوتتالۋشى ب. كىناسىن مويىندامادى، سوتتان ءوزىن اقتاۋدى سۇرادى. س. كىناسىن مويىنداپ، وكىندى.
"ايىپتالۋشىلاردىڭ كىناسى ءىس بويىنشا جينالعان دالەلدەمەلەرمەن، كۋاگەرلەردىڭ ايعاقتارىمەن، سوت ساراپتامالارىنىڭ قورىتىندىلارىمەن دالەلدەندى. سوت ۇكىمىمەن ب. قك-نىڭ 146-بابىنىڭ 3-بولىگى بويىنشا كىنالى دەپ تانىلدى جانە وعان 10 جىل مەرزىمگە باس بوستاندىعىنان ايىرۋ جازاسى تاعايىندالدى. س.-عا قك-نىڭ 432-بابى بويىنشا 4 جىل مەرزىمگە باس بوستاندىعىن شەكتەۋ جازاسى تاعايىندالدى"، - دەلىنگەن جەتىسۋ وبلىستىق سوتى باسپا ءسوز قىزمەتىنىڭ حابارلاماسىندا.
سونداي-اق، سوتتالعانداردان جابىرلەنۋشىلەردىڭ پايداسىنا 15 ملن تەڭگە سوماسىندا مورالدىق زيان ءوندىرىلدى.