الماتىدا سوڭعى ءبىر ايدا بالالارعا شۇعىل مەديسينالىق كومەك كورسەتۋ ورتالىعىنا كۇنگە كۇيگەن بەس ادام جۇگىنگەن.
ءۇش بالا اۋرۋحانادا ەم الدى. ەكەۋى قابىلداۋ ءبولىمىنىڭ جاعدايىندا كومەك الىپ، كەيىن امبۋلاتورلىق ەمدەلۋگە جىبەرىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«اۋرۋحاناعا جاتقىزىلعان بالالاردىڭ ەكەۋى قاپشاعاي سۋ قويماسىندا دەمالىپ جاتقاندا، تاعى ءبىر بالا تاۋدا سەرۋەندەپ جۇرگەندە كۇنگە كۇيگەن. ولارعا بەت، قول، يىقتىڭ 1 جانە 2 دارەجەلى كۇيىك دياگنوزى قويىلدى. دياگنوستيكالىق باقىلاۋ كەزىندە ناۋقاستارعا اۋىرسىنۋدى باساتىن ءدارى، انتيبيوتيكالىق تەراپيا، ۆيتاميندەر تاعايىندالدى. كۇيىك جارا زالالسىزداندىرىلدى. ءتورتىنشى كۇنى ناۋقاستاردىڭ ءبارى ساۋىعىپ، ۇيىنە شىعارىلدى»، - دەدى الماتىداعى بالالارعا شۇعىل مەديسينالىق كومەك كورسەتۋ ورتالىعىنىڭ كۇيىك اۋرۋلارى ءبولىمىنىڭ مەڭگەرۋشىسى رادجا جۇمادىلدايەۆ.
كۇن ساۋلەسىنە كۇيىپ قالعان تاعى ءبىر پاسيەنت №4 قالالىق كلينيكالىق اۋرۋحاناعا جاتقىزىلدى.
«جاعاجايدا كۇنگە كۇيگەن ناۋقاس بەس كۇن بويى ءوز بەتىنشە ۇيدە ەمدەلگەن. جاعدايىنىڭ ناشارلاۋى سالدارىنان ول ءبىزدىڭ اۋرۋحانانىڭ جەدەل جاردەم بولىمىنە ءتۇسىپ، اۋرۋحاناعا جاتقىزىلدى. وعان ەكىنشى دارەجەلى (L55.1) كۇن كۇيىگى، دەنەسىنىڭ جوعارى جانە تومەنگى I-II دارەجەلى ۋلتراكۇلگىن ساۋلەمەن كۇيگەن كۇيىك دياگنوزى قويىلدى. ناۋقاس بەسىنشى كۇنى اۋرۋحانادان شىقتى»، - دەيدى №4 قالالىق كلينيكالىق اۋرۋحانانىڭ كۇيىك ءبولىمىنىڭ مەڭگەرۋشىسى ەلدوس المەنوۆ.
دارىگەرلەر بالالاردى سىرتقا شىعارۋعا، تىكەلەي كۇن ساۋلەسىنەن اۋلاق ۇستاۋعا كەڭەس بەرەدى.
«بالالارعا تابيعي ماتەريالداردان تىگىلگەن جەڭىل، كەڭ كيىم كيۋ كەرەك، 11-16 ساعات ارالىعىندا تىكەلەي كۇن ساۋلەسىنەن اۋلاق بولۋ كەرەك جانە كۇننەن قورعايتىن كرەمدەردى قولدانۋ قاجەت. بالالاردى سالقىن سۋمەن جانە جەمىستەرمەن قامتاماسىز ەتۋ دە ماڭىزدى»، - دەدى بالالار شۇعىل مەديسينالىق كومەك ورتالىعىنىڭ كوپسالالى سوماتيكالىق بولىمشەسىنىڭ مەڭگەرۋشىسى شولپان قايپنازاروۆا.