قۇپيا قۇجاتتامانى جويۋعا زاڭسىز بۇيرىق بەرگەن
تالدىقورعان قالالىق سوتىندا لاۋازىمدى ادامنىڭ ءوز قۇقىقتارى مەن وكىلەتتىكتەرىنەن تىس جانە اۋىر زارداپتارعا اكەلىپ سوققان بيلىك پەن لاۋازىمدىق وكىلەتتىكتەردى اسىرا پايدالانۋى فاكتىسى (ق ر قك-نىڭ 362-بابىنىڭ 4-بولىگى) بويىنشا ك-گە قاتىستى ءىس قارالدى، دەپ حابارلايدى Almaty-akshamy.kz.
"سوتپەن انىقتالعانداي، ك. الماتى وبلىسى ۇقكد باستىعى بولا تۇرا، ءوزىنىڭ لاۋازىمدىق وكىلەتتىگىنەن اسىرا پايدالانا وتىرىپ، 2022 جىلعى 5 قاڭتاردا ورىن العان وقيعالاردى ەسكەرە وتىرىپ، ءوزىنىڭ لاۋازىمدىق مىندەتتەرىن ەلەمەي، جەكە قۇرامعا دەپارتامەنت عيماراتىن قورعاۋ جونىندە شارالار قولدانباۋعا؛ اكىمشىلىك عيماراتتان كەتۋگە؛ قىزمەتتىك جانە قۇپيا قۇجاتتامانى جويۋعا جانە تۇرعىلىقتى جەرلەرىنە تاراۋعا زاڭسىز بۇيرىق بەرگەن، ناتيجەسىندە كەيىننەن ۇقكد عيماراتىن باسىپ الۋعا اكەلىپ سوقتىردى ("قۇپيا" دەگەن بەلگىگە بايلانىستى باسقا ءمان-جايلاردى جاريا ەتۋ مۇمكىن ەمەس)"، - دەلىنگەن تالدىقورعان قالالىق سوتى تاراتقان مالىمەتتە.
سوت ۇكىمىمەن ك. 362-باپتىڭ 4-بولىگى بويىنشا كىنالى دەپ تانىلدى جانە وعان 10 جىل مەرزىمگە قۇقىق قورعاۋ ورگاندارىندا بەلگىلى ءبىر لاۋازىمداردى اتقارۋ قۇقىعىنان ايىرا وتىرىپ، 6 جىلعا باس بوستاندىعىنان ايىرۋ جازاسى تاعايىندالعانى دا ناقتىلانادى.
"قازاقستان رەسپۋبليكاسىنىڭ پرەزيدەنتىنە ك.-گە قاتىستى ۇلتتىق قاۋىپسىزدىك گەنەرال-مايورى ارناۋلى اتاعىنان جانە مەملەكەتتىك ناگرادالار مەن وردەندەردەن ايىرۋ تۋرالى ۇسىنىس ەنگىزىلدى. سوت ۇكىمى زاڭدى كۇشىنە ەنگەن جوق"، - دەلىنگەن حابارلامادا.