رينات بالگابايەۆ «زاكلادكا» ماسەلەسىنە ارنالعان جاڭا دەرەكتى ءفيلمىن جارىققا شىعاردى، دەپ حابارلايدى aqshamnews.kz
بۇل فيلمدە جەڭىل ءارى تەز تابىسقا قۇنىعىپ، ەسىرتكى تاسىمالداۋعا كەلىسىپ، كەيىن بۇل ارەكەتىنىڭ وتە اۋىر سالدارىنا دۋشار بولعان ادامداردىڭ تاعدىرىن باياندايدى. «زاكلادچيكتەردىڭ» كوپشىلىگى، وكىنىشكە وراي، ءوز ءىسىنىڭ قاۋىپتىلىگىن جانە ونىڭ ءومىردى تالقانداپ قانا قويماي، باس بوستاندىعىنان ايىرىلۋ جازاسىنا الىپ كەلەتىنىن تۇسىنبەي جاتادى. قۇقىق قورعاۋ ورگاندارىنىڭ مالىمەتىنشە، مۇنداي ارەكەت ءۇشىن ەڭ از جازا مەرزىمى – 10 جىل تۇرمە.
فيلمدە بالگابايەۆ وسى جولعا ءتۇسىپ، تاعدىرىنا بالتا شابىلعان ادامداردىڭ شىنايى اڭگىمەلەرىن جيناقتاعان. جاساعان ارەكەتتەرى ءۇشىن ومىرلەرىنىڭ ءمانىن جوعالتقانىن سەزىنىپ، ەندى باسقا ادامدارعا ساباق بولۋدى كوزدەگەن كەيىپكەرلەردىڭ ءومىرى ارقىلى كورەرمەنگە باستى ءبىر وي جەتكىزىلدى: «قانشا اقشا تاپساڭ دا، ول سەنىڭ بوستاندىعىڭ مەن بولاشاعىڭا تۇرمايدى».
بۇل فيلم ءار جاسقا وي سالادى. جاستار ءۇشىن قاتە ءبىر تاڭداۋدىڭ سالدارى ارمان-ماقساتتارىنان ءبىر ساتتە ايىرۋى مۇمكىن. قاۋىپ-قاتەرلەر مەن اۋىر زارداپتاردان اۋلاق بولۋ – ءاربىر ادامنىڭ ءوز قولىندا. وزدەرىڭدى جانە جاقىندارىڭدى مۇنداي ءقاۋىپتى تابىس كوزدەرىنەن قورعاڭدار.