يوردانيا استاناسى اممان قالاسىندا ءوتىپ جاتقان گرەك-ريم كۇرەسىنەن 20 جاسقا دەيىنگى جاستار اراسىنداعى ازيا چەمپيوناتى وتۋدە.
قازاقستاندىق بالۋاندار بۇل دودادا 3 كۇمىس، 1 قولا مەدال الدى، دەپ حابارلايدى Almaty-akshamy.kz.
12 شىلدەدەن باستاپ كۇرەس تۇرلەرىنەن 15 جانە 20 جاسقا دەيىنگى جاسوسپىرىمدەر مەن جاستار اراسىندا ازيا چەمپيوناتى ءوتىپ جاتىر.
جارىستىڭ ءتورتىنشى كۇنىندە گرەك-ريم كۇرەسىنەن 20 جاسقا دەيىنگى جاستار سىنعا ءتۇستى. ولاردىڭ اراسىنان قازاقستاندىق ءۇش بالۋان فينالدا كۇش سىناسسا، بىرەۋى قولا جۇلدەنى ساراپقا سالدى.
فينالعا شىققان ايبەك ايتبەكوۆ (55 كەلى)، يۋسۋف اشرافوۆ (60 كەلى) جانە نۇراسىل امانالى (87 كەلى) قارسىلاستارىنا ەسە جىبەرىپ، كۇمىس جۇلدەنى قاناعات تۇتتى.
ال 130 كەلىدەگى جوحار ۋزاروۆ قولا ءۇشىن بولعان تالاستا پالەستينا بالۋانىن ۇتتى.
ەندى 16 شىلدەدە U20 گرەك-ريم كۇرەسىنەن 60، 67، 72، 82 جانە 97 كەلىدە جۇلدەلەر ساراپقا سالىنادى.