قانداستاردى قابىلداۋ تەتىگى قايتا قارالادى

ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا قانداستاردى ەلدە قابىلداۋدا قانداي وزگەرىستەر بولۋى مۇمكىن ەكەنىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

«بەسىنشى نوۆەللا – بۇل جاڭا كوشى-قون ساياساتى. ونىڭ ماقساتى – قازاقستان ەكونوميكاسىن سۇرانىسقا يە جانە بىلىكتى كادرلارمەن قامتاماسىز ەتۋ. جاڭا كوشى-قون ساياساتى 4 مىندەتتى شەشۋدى كوزدەيدى: سۇرانىسقا يە كادرلاردى تارتۋ؛ ينۆەستيسيا تارتۋ؛ شەتەلدە تۇراتىن ەتنيكالىق قازاقستاردىڭ الەۋەتىن پايدالانۋ؛ شەتەلدە جۇمىس ىستەيتىن قازاقستاندىقتاردىڭ ەڭبەك قۇقىقتارىن قورعاۋ»، - دەدى تامارا دۇيسەنوۆا.

ءبىرىنشى مىندەت اياسىندا ەكونوميكا سالالارى ءۇشىن سۇرانىسقا يە تەحنولوگيالار بويىنشا ۇزدىك وقىتۋشىلاردى، ۇزدىك عالىمداردى، تاپشى كاسىپتەر بويىنشا مامانداردى تارتۋ ماقساتىندا  جەڭىلدەتىلگەن ۆيزالار مەن 10 جىلعا تۇرۋ قۇقىعى بەرىلەدى.

ءمينيستردىڭ ايتۋىنشا، ەكىنشى مىندەتتى شەشۋ ءۇشىن 300 مىڭ اقش دوللاردەن كەم ەمەس ينۆەستيسيا سالۋدى كوزدەگەن شەتەل كاسىپكەرلەرى ءۇشىن «ينۆەستورلىق ۆيزانى» ۇسىنادى.

«ءۇشىنشى مىندەتتە كورسەتىلگەن تاپسىرمالاردى شەشۋ ءۇشىن «اتامەكەن» كارتاسى ەنگىزىلەدى، ول جوعارى دەڭگەيدەگى كاسىپقوي نەمەسە وزدەرى تۇراتىن ەلدەردە تابىستى بيزنەس-كەيستەردى ىسكە اسىرعان جانە ولاردى قازاقستاندا ىسكە اسىرۋدى قالايتىن ەتنيكالىق قازاقتارعا بەرىلەدى. ول ازاماتتار مەرزىمى 10 جىلعا دەيىن سوزىلاتىن جەڭىلدەتىلگەن ۆيزا راسىمدەپ، قازاقستاندا تۇرىپ ءوز كاسىبىن جۇرگىزۋگە مۇمكىندىك الادى»، - دەپ ءتۇسىندىردى ول.

قانداستاردى قابىلداۋ تەتىگى دە قايتا قارالاتىنىن مينيستر اتاپ ءوتتى. قانداستاردى قونىستاندىرۋ ساياساتىن ەلدىڭ دەموگرافيالىق جانە ەكونوميكالىق ۇردىستەرىن ەسكەرە وتىرىپ، ولاردى قۇجاتتاردى قابىلداۋدىڭ باستاپقى كەزەڭىندە قونىستاندىرۋ وڭىرلەرىنە كوشىپ-قونۋدى قوسىمشا ىنتالاندىرا وتىرىپ تۇبەگەيلى رەفورمالاۋ ۇسىنىلدى.

شەتەلدە جۇمىس ىستەيتىن قازاقستاندىقتاردىڭ ەڭبەك قۇقىقتارىن قورعاۋ ءۇشىن ازاماتتارىمىز ەڭ كوپ جۇمىس ىستەيتىن ەلدەردە قازاقستاندىق ەڭبەك ميگرانتتارىنىڭ قۇقىقتارىنا كەپىلدىك بەرەتىن مەملەكەتارالىق كەلىسىمدەر پاكەتىن قابىلداۋ قاراستىرىلدى.