حالىقارالىق «قازاق» ءتىلى قوعامىنىڭ استانالىق فيليالى ءتوراعاسى قانات اۋەسباي مەملەكەت باسشىسىنىڭ كونستيتۋسياعا ەنەتىن وزگەرىستەر بويىنشا رەفەرەندۋم وتكىزۋ تۋرالى ۇسىنىسىنا پىكىر ايتتى، دەپ حابارلايدى Almaty-akshamy.kz Qazaquni.kz-كە سىلتەمە جاساپ.
«پرەزيدەنت ايتقان كونستيتۋسياعا ەنەتىن وزگەرىستەر بويىنشا رەفەرەندۋم وتەتىنى تۋرالى جاڭالىقتى ىقىلاستانا تىڭدادىق. ەڭ الدىمەن رەفەرەندۋم حالىقتىڭ وي ەركىن ايقىن بىلدىرۋگە زور مۇمكىندىك دەپ بىلەمىن. توتە دەموكراتيانىڭ داڭعىل جولى وسى بولماق. سوڭعى رەت رەفەرەندۋمنىڭ ەلىمىزدە 17 جىل بۇرىن وتكەنى ەستە. ول تۇستاعى قازاقستانداعى ساياسي پاراديگما مۇلدە باسقا ەدى. ەندىگى جەردە كونستيتۋسياعا ەنەتىن وزگەرىستەر جاڭا ساياسي رەفورمالاردىڭ باستاۋى بولماق. «ەكىنشى رەسپۋبليكانىڭ» ءمانىن وسى تۇرعىدان ىزدەگەن ابزال. ءبىر ايتا كەتەرى، اتا زاڭعا ەنەتىن 33 وزگەرىستىڭ ءارقايسىن الدىمەن قوعام تالقىسىنا سالىپ، ابدەن يلەۋدەن وتكىزىپ الۋ كەرەك. ەسەسىنە ەلدىڭ كوكەيىندەگىسىن تاپ باسقان وزگەرىستەردى حالىقتىڭ قابىلداۋى دا سوعۇرلىم جەڭىل بولادى دەپ ەسەپتەيمىن» – دەدى ول.
ونىڭ سوزىنشە اتا زاڭ رەفورماسى بيلىك تارماقتارى اراسىنداعى تەپە-تەڭدىكتى ساقتاپ، حالىقتىڭ ەل باسقارۋ ىسىنە قاتىسۋ قۇزىرىن كەڭەيتەدى.
«ءقازىردىىڭ وزىندە بۇل وزگەرىستەر مەملەكەتتىك بيلىكتىڭ جۇيەلى تۇردەگى ترانسفورماسياسى دەپ اتالىپ كەتتى. ازىرگە ەلىمىزدىڭ كونستيتۋسيالىق كەڭەسى بۇل وزگەرىستەردى قاراستىرىپ جاتىر. ەلىمىزدىڭ ساياسي تاريحىنداعى ايشىقتى وقيعا دەپ قابىلداۋعا بولاتىن مەملەكەت باسشىسىنىڭ باستاماسىنا «جاڭا قازاقستان» جانە «قۇلاق اساتىن مەملەكەت» تۇجىرىمداماسىنا تولىق ساي كەلەدى» – دەيدى قانات اۋەسباي.