9 جەلتوقساندا ساعات 22:30-دا الماتىدا باستالعان جاۋىن-شاشىن ءتۇن جارىمدا قالىڭ قارعا ۇلاستى. 10 جەلتوقسان ساعات 07:00-دەگى مالىمەت بويىنشا قاردىڭ قالىڭدىعى 35 سانتيمەترگە جەتتى. بۇل ايلىق نورمانىڭ جارتىسىنا جۋىعى. مۇنى الماتى قالاسىنىڭ كوممۋنالدىق ينفراقۇرىلىم جانە تۇرعىن ءۇي ينسپەكسياسى باسقارماسىنىڭ وكىلدەرى حابارلادى.
كولىك قوزعالىسىنىڭ ۇزدىكسىزدىگىن قامتاماسىز ەتۋ جانە تۇرعىنداردىڭ ءقاۋىپسىز ءجۇرىپ-تۇرۋىنا جاعداي جاساۋ ماقساتىندا كوممۋنالدىق قىزمەت كۇشەيتىلگەن جۇمىس تارتىبىنە اۋىستىرىلدى.
ۆەدومستۆونىڭ دەرەگىنشە، قالاداعى قار كۇرەۋ جۇمىستارىنا 2 728 جۇمىسشى مەن 75 جەدەل بريگادا جۇمىلدىرىلعان. قالا جولدارىنا 1 000-نان استام ارنايى تەحنيكا شىعارىلدى، ونىڭ ىشىندە كوكتايعاقتى بولدىرماۋ ءۇشىن ارنايى قوسپا سەبەتىن 228 قۇراما جول ماشيناسى بار. كولوننالاردىڭ قوزعالىسىن قامتاماسىز ەتۋ ءۇشىن 22 پوليسيا ەكيپاجى، سونداي-اق 10 ەۆاكۋاتور مەن مانيپۋلياتور تارتىلعان.
مامانداردىڭ ايتۋىنشا، ساعات 04:00-تەن باستاپ ماگيسترالدار مەن اۋداندىق كوشەلەردى تازالايتىن 21 كولوننا جۇمىسقا كىرىستى. سونىمەن قاتار تروتۋار، ايالداما مەن جۇرگىنشىلەر اۋماعى كۇرەلىپ جاتىر. ساعات 05:00-دە 37 جەكە مەردىگەر ۇيىمنىڭ 1 790 جۇمىسشىسى مەن 256 تەحنيكاسى اۋلالاردى تازالاۋ جۇمىستارىنا جۇمىلدىرىلدى.
بۇعان قوسا، قالادا جول مەن كوشەنىڭ جاعدايىن باقىلاۋ ءۇشىن تاۋلىك بويى كەزەكشىلىك قويىلعان. بارلىق كوممۋنالدىق قىزمەت قار تولىق تازالاعانعا دەيىن كۇشەيتىلگەن رەجيمدە جۇمىسىن جالعاستىرا بەرەدى.