اۋرۋحاناداعى نەيرورەابيليتاسيا ءبولىمى 2020 جىلى اشىلعان بولاتىن. سول ۋاقىتتان بەرى 1000-نان استام ادام وڭالتۋدان ءوتتى.
الماتىلىقتار مىندەتتى الەۋمەتتىك مەديسينالىق ساقتاندىرۋ شەڭبەرىندە №7 قالالىق كلينيكالىق اۋرۋحانانىڭ نەيرورەابيليتاسيا بولىمىندە وڭالتۋدىڭ ەكىنشى كەزەڭىنەن وتە الادى، دەپ حابارلايدى Almaty-akshamy.kz اۋرۋحانانىڭ باسپا ءسوز قىزمەتىنە سىلتەمە جاساپ.
ميداعى قان اينالىمىنىڭ بۇزىلۋى سالدارىنان ينسۋلت العان نۇرجامال وماروۆا 7ء-شى اۋرۋحانانىڭ ينسۋلت بولىمىندە ەمدەلگەن. كەيىن دەنساۋلىعىن قالپىنا كەلتىرۋ ءۇشىن وسى مەكەمەنىڭ نەيرورەابيليتاسيا بولىمىنە جولداما بەرىلدى.
ءبولىم مەڭگەرۋشىسى اينۇر دوسىبايەۆانىڭ ايتۋىنشا، اۋرۋحاناعا تۇسكەن كەزدە پاسيەنت بىرەۋدىڭ كومەگىنسىز جۇرە المايتىن. ينسۋلت سالدارىنان قولى اۋىرىپ، وڭ قولىنداعى بۇلشىق ەتتەرى جانسىزدانىپ قالعان.
«ەكىنشى كەزەڭدەگى وڭالتۋ كۋرسىنان وتكەننەن كەيىن، ول تاياققا سۇيەنىپ جۇرە باستادى، اياعىن نىق باسىپ، قولداعى بۇلشىق ەتتەر قاتايدى. دەنەدەگى اۋىرسىنۋ باسىلىپ، ەموسيونالدىق جاعدايى جاقساردى، ەمدى جالعاستىرۋعا دەگەن قۇلشىنىسى ارتتى»، - دەيدى مامان.
«رەابيليتاسيادان ءوتىپ، دەنساۋلىقتى قالپىنا كەلتىرۋگە مۇمكىندىك جاسالعانىنا ريزامىن. 7ء-شى اۋرۋحانانىڭ وڭالتۋ بولىمىندە قابىلداعان ەمنىڭ ارقاسىندا دەنساۋلىعىم تۇزەلە باستادى. جاعدايىم ەداۋىر جاقسارىپ، وزدىگىممەن ءجۇرىپ-تۇراتىن بولدىم، تاماقتى ءوزىم جەيمىن. بولىمشە قىزمەتكەرلەرىنە ايتار العىسىم شەكسىز»، - دەيدى نۇرجامال وماروۆا.
اۋرۋحاناداعى نەيرورەابيليتاسيا ءبولىمى 2020 جىلى اشىلعان بولاتىن. سول ۋاقىتتان بەرى 1000-نان استام ادام وڭالتۋدان ءوتتى. بۇل جەردە ميىنا جانە جۇلىنىنا وپەراسيا جاساتقان، ميداعى قان اينالىمى قىزمەتىنىڭ بۇزىلۋىنان ينسۋلت العان پاسيەنتتەر رەابيليتاسيانىڭ 2-كەزەڭىنەن وتە الادى. ولار مۇندا الماتىدان وزگە دە وڭىرلەردەگى اۋرۋحانالار مەن ەمحانالاردان تۇسەدى.
وڭالتۋدان قالاي وتەدى؟
جوسپارلى تۇردە ەم قابىلدايتىن پاسيەنت ستاسيونارعا «اۋرۋحاناعا جاتقىزۋ بيۋروسى» پورتالى ارقىلى جاتقىزىلادى. بۇرىن كوپشىلىك جاعدايدا اقىلى تۇردە كورسەتىلەتىن وڭالتۋدان ءقازىر ساقتاندىرىلعان ازاماتتار ينسۋلت العاننان كەيىن نەمەسە وتادان سوڭ 9 اي ىشىندە وتە الادى.
دەنساۋلىقتى قالپىنا كەلتىرۋگە باعىتتالعان ەم-دوم كۋرسى قالاي جۇرگىزىلەدى؟
بولىمشەدە نەگىزىنەن رەابيليتاسيانىڭ بوتا، PNF سىندى ادىستەرى، ەرگوتەراپيا قولدانىلادى. ولار اياق-قولى جانسىزدانىپ، سال بولىپ قالعان پاسيەنتتەردىڭ وزدىگىنەن ءجۇرىپ-تۇرۋ قابىلەتىن قالپىنا كەلتىرۋگە مۇمكىندىك بەرەدى. جاتتىعۋلار ارنايى قوندىرعىلارمەن جابدىقتالعان كينەزيوتەراپيا زالىندا وتەدى.
سونىمەن قاتار، فيزيوتەراپيانىڭ ماگنيتتى تەراپيا، ءپارافيندى اپپليكاسيا، ەلەكتروفورەز، سمت، بيوپترون، ۋۆچ، ماسساج سىندى تۇرلەرى مەن گيپەرباريكالىق وكسيگەندى تەراپيا، ينەمەن ەمدەۋ سىندى ساۋىقتىرۋ تاسىلدەرى جان-جاقتى قولدانىلادى. سونىمەن قاتار، پاسيەنتتەرگە پسيحوتەراپيەۆت پەن لوگوپەد ماماندار كومەك كورسەتەدى.
ەستەرىڭىزگە سالا كەتسەك، مەديسينالىق وڭالتۋ ءۇش كەزەڭنەن تۇرادى.
وڭالتۋدىڭ 2-كەزەڭى اۋرۋحانالاردىڭ مامانداندىرىلعان بولىمشەلەرىندە نەمەسە رەسپۋبليكالىق دەنساۋلىق ساقتاۋ ۇيىمدارىنىڭ، مامانداندىرىلعان وڭالتۋ ورتالىقتارى مەن كوپبەيىندى ستاسيونارلار بازاسىندا وتەدى. بۇل كەزەڭدە ەمدى اۋرۋ باستالعان ساتتەن باستاپ 9 اي ىشىندە جۇرگىزۋ قاجەت. كۋرستىڭ ۇزاقتىعى مەن جيىلىگى نوزولوگياعا، ناۋقاستىڭ دەنساۋلىق جاعدايىنا تاعى دا باسقا فاكتورلارعا بايلانىستى بولماق.