جاڭا ينستيتۋت پايدا بولادى.
ق ر مەملەكەتتىك حاتشىسى ەرلان قارين Youtube ارناسىندا كونستيتۋسيالىق رەفورما تۋرالى كەزەكتى ۆيدەو جاريالادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
كونستيتۋسيالىق رەفورما قاراپايىم حالىققا نە بەرەدى؟ ساياساتتان الىس قاراپايىم تۇرعىندار بۇدان نە ۇتادى؟ كونستيتۋسيالىق تۇزەتۋلەردىڭ حالقىمىزعا قانداي پايداسى بار؟
بۇل جولعى روليكتە مەملەكەتتىك حاتشى وسى سۇراقتارعا جاۋاپ بەرۋگە تىرىسقان.
«بۇل رەفورمانىڭ وڭ اسەرىن ەلىمىزدىڭ بۇكىل ازاماتى سەزىنەتىن بولادى. ءبىرىنشى. كونستيتۋسيالىق كەڭەس كونستيتۋسيالىق سوت بولىپ قايتا قۇرىلادى. ول وسى ورگاننىڭ اتاۋى عانا وزگەرەدى دەگەن ءسوز ەمەس. قۇزىرى ودان الدەقايدا اۋقىمدى، مۇلدە باسقا، جاڭا ينستيتۋت پايدا بولادى. كونستيتۋسيالىق سوت اتا زاڭعا قايشى كەلەتىن كەز كەلگەن زاڭنىڭ نەمەسە وزگە دە قۇقىقتىق اكتىنىڭ كۇشىن جويا الادى»، - دەيدى ەرلان قارين.
سونداي-اق، ول كونستيتۋسيالىق سوتقا جۇگىنۋ ءتارتىبى قالاي رەتتەلەتىنىن ءتۇسىندىردى.
«كونستيتۋسيالىق سوتقا پرەزيدەنت، سەنات پەن ءماجىلىس ءتوراعالارى، پارلامەنت دەپۋتاتتارىنىڭ كەم دەگەندە بەستەن ءبىرى، پرەمەر-مينيستر، ادام قۇقىقتارى جونىندەگى ۋاكىل، باس پروكۋرور جانە ەڭ باستىسى، ەلىمىزدىڭ كەز كەلگەن ازاماتى جۇگىنە الادى. ياعني، كەز كەلگەن ازامات قانداي دا ءبىر نورماتيۆتىك اكت ونىڭ كونستيتۋسيادا بەكىتىلگەن بوستاندىقتارى مەن قۇقىقتارىن شەكتەيدى دەپ ساناسا، كونستيتۋسيالىق سوتقا شاعىمدانا الادى. مۇنداي قۇقىقتاردىڭ اۋقىمى كەڭ. كونستيتۋسيالىق سوتتىڭ شەشىمى قابىلدانعان كۇننەن باستاپ كۇشىنە ەنەدى جانە ەلىمىزدىڭ بۇكىل اۋماعىندا جالپىعا مىندەتتى سانالادى. مۇنداي تۇپكىلىكتى شەشىمدەرگە شاعىم كەلتىرۋگە بولمايدى»، - دەدى مەملەكەتتىك حاتشى.
بۇعان دەيىن 5 ماۋسىمدا ءوتۋى جوسپارلانعان رەفەرەندۋمداعى حالىقارالىق بايقاۋشىلاردى تىركەۋ 30 مامىرعا دەيىن جالعاساتىنى ايتىلعان بولاتىن.