47 جاستاعى پاسيەنتتىڭ بۇل سىرقاتقا شالدىققانىنا ون جىلعا جۋىقتاعان. بوسانعان كەزدە پايدا بولعان اۋرۋدىڭ اسقىنعانى سونشالىق، سوڭعى كەزدە ۇلكەن دارەتكە وتىرۋ ۇلكەن پروبلەماعا اينالىپتى. جەتىنشى اۋرۋحانانىڭ كولوپروكتولوگيا بولىمشەسى ماماندارى وعان 3-دارەجەلى كوتەۋ دەگەن دياگنوز قويدى، دەپ حابارلايدى Almaty-akshamy.kz.
№7 قكا باسپا ءسوز قىزمەتى تاراتقان حابارلاماعا سۇيەنسەك، ەپيدۋرالدى جانسىزداندىرۋ ارقىلى تىك ىشەككە لونگو وپەراسياسى جاسالعان. زاماناۋي اپپاراتتىڭ كومەگىمەن جاسالعان وتا ءساتتى وتكەن. پاسيەنت ءۇشىنشى كۇنى اۋرۋحانادان شىعىپتى. سەبەبى شاعىن ءينۆازيۆتى وتا ورنى ءداستۇرلى وپەراسيالارعا قاراعاندا تەز جازىلادى، اۋىرسىنۋ سەزىمى دە الدەقايدا تومەن بولادى. پاسيەنتتەر ەكىنشى كۇنى اياققا تۇرىپ، دارەتكە وتىرعاندا قينالمايدى. جالپى، مۇنداي وتادان كەيىن ناۋقاستىڭ دەنساۋلىعى 7-8 كۇندە قالىپقا كەلەدى، دەيدى ماماندار.
«وپەراسيادان بەرى 10 كۇن ءوتتى، دارىگەرلەرگە العىس ايتۋ ءۇشىن ءوز اياعىممەن اۋرۋحاناعا كەلىپ تۇرمىن. ماعان باقىت سىيلاعان، جۇمىس ىستەۋگە، ادامشا ءومىر سۇرۋگە مۇمكىندىك بەرگەن اق حالاتتىلارعا ايتار العىسىم شەكسىز»، - دەيدى پاسيەنت.
ءبىر ايتا كەتەرلىگى، وتا مىندەتتى الەۋمەتتىك مەديسينالىق ساقتاندىرۋ پاكەتى شەڭبەرىندە جامالدى.
№7 اۋرۋحانانىڭ كولوپروكتولوگيا بولىمشەسى مەڭگەرۋشىسى مارات كالەنبايەۆتىڭ سوزىنە سۇيەنسەك، لونگو وپەراسياسى كوتەۋدىڭ III-IVء-شى ستادياسىندا قولدانىلادى. ول تىكىشەكتىڭ اناتوميالىق قۇرىلىمىن قالپىنا كەلتىرۋگە مۇمكىندىك بەرەدى. بۇل ءادىستى قولدانعاندا زاقىمدانعان ىشەكتەر كەسىپ الىنباي، كەرىسىنشە جوعارى قاراي تارتىلادى. ىشەكتەگى شىرىشتى قابىقتىڭ گەمورروي تۇيىندەرىنەن جوعارى ورنالاسقان بولىگىن كەسىپ الىپ تاستاعاننان كەيىن تۇيىندەر وزدىگىنەن ءتۇسىپ قالادى.