بەلگىلى قالامگەر، قازاقستاننىڭ ەڭبەك سىڭىرگەن قايراتكەرى، پرەزيدەنت سىيلىعىنىڭ لاۋرەاتى قالي سارسەنبايدىڭ ەكى بىردەي كىتابىنىڭ تۇساۋى كەسىلدى، دەپ حابارلايدى Almaty-akshamy.kz.
ونىڭ ءبىرى كسرو جانە قازاقستاننىڭ حالىق ءارتيسى، قازاقستاننىڭ ەڭبەك ەرى ءاسانالى ءاشىم ۇلى تۋرالى. «كوريفەي» دەپ اتالادى. قالي سارسەنبايدىڭ بۇعان دەيىن دە اتى اڭىزعا اينالعان ءاسانالى جايىندا جازعان ءبىر كىتابى جارىق كورگەن بولاتىن. ال كەزەكتى تۋىندىسىنا بەلگىلى تۇلعانىڭ ونەردەگى ءھام ومىردەگى ءجۇرىپ وتكەن جولىندا كەزدەسكەن وقيعالار، توسىن قىرلارى مەن سىرلارى باياندالادى. ال ەكىنشى «جۋرناليست – ءومىر بارلاۋشىسى، جۋرناليستيكا – ءومىر مەكتەبى» دەگەن كىتاپ كاسىبي جۋرناليست، حالىقارالىق «الاش» ادەبي سىيلىعىنىڭ لاۋرەاتى جانبولات اۋپبايەۆپەن جۇرگىزىلگەن سۇحباتتارعا ارنالعان، سول زامانداسى جونىندەگى «1001ء-شى ماقالا» دەگەن ەسسەمەن تۇيىندەلەدى. جالپى، قازاق باسپاسوزىندەگى تۇلعالار جونىندە، ولاردىڭ تاعلىمى، جالپى ۇلت باسپاسوزىندەگى قىزىقتى دەرەكتەر، وقيعالار باياندالاتىن بۇل كىتاپتى جۋرناليستيكا فاكۋلتەتتەرىنە قوسىمشا وقۋلىق رەتىندە ۇسىنۋعا بولادى دەپ وتىر پىكىر بىلدىرۋشىلەر.
كىتاپتىڭ تانىستىرىلىمىنا ەلىمىزگە بەلگىلى اقىن-جازۋشىلار، قوعام قايراتكەرلەرىمەن بىرگە، قالي سارسەنبايدىڭ ەكى كەيىپكەرى دە قاتىسىپ، لەبىزدەرىن جەتكىزدى.
كەنجەحان ماتىجانوۆ، عالىم:
– قالي سارسەنبايدى «جۇرەكتى جۋرناليست» دەپ اتار ەدىم. جانە مۇنى ەكى ءتۇرلى ماعىنادا ايتۋعا بولادى. بىرەۋى – ەرلىگى، باتىرلىعى. ەكىنشىسى – قازاق ونەرى مەن مادەنيەتىنە دەگەن سۇيىسپەنشىلىگى. قالەكەڭنىڭ جۋرناليستىك ەڭبەكتەرىنىڭ نەگىزگى بولىگى – ونەر مەن مادەنيەت تۋرالى. بۇرىن اكىمدەردىڭ ىس-قىزمەتى جونىندە اقپار عانا بەرۋمەن شەكتەلەتىن «Almaty aqshamy» گازەتىن قازاق مادەنيەتى، ونەرى، ادەبيەتى قاقىندا وقىلاتىن دۇنيەلەر باساتىن رۋحاني گازەتكە اينالدىردى. سونىڭ ارقاسىندا اتالعان گازەتكە رۋحاني جىلىلىق كەلدى. ادەتتە ونەر ادامدارى تۋرالى ومىردەن ءوتىپ كەتكەننەن كەيىن جازامىز. ءتىرى ادام تۋرالى جازۋ وڭاي ەمەس. قالەكەڭدى جۇرەكتى جۋرناليست دەپ باعالايتىنىم سوندىقتان. «كوريفەي» - بۇگىنگى دەرەكتى پروزانىڭ تابىسى.
ءامىرحان مەڭدەكە، سىنشى:
– «كوريفەي» – ءاسانالى ءاشىموۆتىڭ كۇندەلىكتەرى تۋرالى كىتاپ. سول تۋرالى وي تولعايدى. ءبىر كۇنى قالي اسەكەڭنىڭ ۇيىنە بارسا، ۇلكەن-ۇلكەن 29 كىتاپتى كورەدى. مۇنى حالىققا بەرمەيسىز بە دەپ جاتا جابىسادى. ءىشى تولعان تاريحي ۋاقىتتىڭ شىندىعى. ءبۋنيننىڭ كۇندەلىكتەرىن وقىعاندا، ونىڭ اقسۇيەكتىگى، بەكزاتتىعى كورىنىپ تۇرادى. اسەكەڭنىڭ كۇندەلىكتەرىنەن دە سول ىرىلىگى، تەكتىلىگى بايقالادى. «ءاسانالىنى تانۋ – قازاقتى تانۋ» دەگەن قاليدىڭ ءسوزى ورىندى. قالي تۇلعا دەپ كىمدى ايتۋعا بولاتىنىن دالەلدەدى. جاقىندا «انا ءتىلى» گازەتىنەن قاليدىڭ «نوتاعا سىيماعان نۇرعيسا» دەگەن ەسسەسىن وقىدىم. وقىپ وتىرىپ ەكى رەت ورنىمنان تۇرىپ كەتتىم. نۇرعيسانىڭ «ماحامبەت» سيمفونيالىق پوەماسىن تىڭداعاندا موسارتتى، بەتحوۆەندى تىڭداعاننان دا كۇشتى اسەر العانىن جازىپتى. ويتكەنى ول – ءوزىمىز. قانىمىز، جانىمىز. «ۇلتقا ەڭ الدىمەن ءوز مۋزىكاسى كەرەك» دەپتى. وسىنداي دۇنيەلەردى ستۋدەنتتەرگە وقىتۋ كەرەك.
«كوريفەي» مەن «جۋرناليست – ءومىر بارلاۋشىسى، جۋرناليستيكا – ءومىر مەكتەبى» - قالامگەردىڭ «تۇلعاتانۋ» سەرياسىمەن جارىق كورىپ وتىرعان جەتىنشى، سەگىزىنشى كىتابى. «ARNA-B» باسپاسىنان جارىق كوردى.
«تۇران» ۋنيۆەرسيەتىنىڭ تورىندە وتكەن رۋحاني كەش سوڭىندا ۋنيۆەر رەكتورى راحمان الشانوۆ ءاسانالى ءاشىموۆ پەن قالي سارسەنبايعا «قۇرمەتتى پروفەسسور» اتاعىن بەردى.