ۇلتتىق قۇرىلتايداعى ويلار مەن ۇسىنىستار
قازاقستان جازۋشىلار وداعىندا وتكەن شىعارماشىلىق قاۋىم وكىلدەرىنىڭ باسقوسۋىندا مەملەكەت باسشىسى قاسىم-جومارت توقايەۆتىڭ قاتىسۋىمەن بۋرابايدا ۇيىمداستىرىلعان ۇلتتىق قۇرىلتايدىڭ ءتورتىنشى وتىرىسىندا كوتەرىلگەن ماسەلەلەر كەڭىنەن تالقىلاندى. قوعامدى تولعاندىرىپ وتىرعان رۋحاني، مادەني جانە الەۋمەتتىك تاقىرىپتار توڭىرەگىندەگى پىكىرلەر قالامگەرلەر تاراپىنان قولداۋ تاۋىپ، ماڭىزدى ۇسىنىستار ايتىلدى. بۇل تۋرالى Aqshamnews.kz سايتى حابارلايدى.
ۇلتتىق قۇرىلتاي – جاڭعىرۋ مەن جاڭارۋ الاڭى
جيىندى اشقان قازاقستان جازۋشىلار وداعى باسقارماسىنىڭ ءتوراعاسى مەرەكە قۇلكەنوۆ قۇرىلتايدىڭ بۇل جولعى وتىرىسىندا ازاماتتىق قوعام، مادەنيەت، ءبىلىم، عىلىم جانە الەۋمەتتىك دامۋ سىندى سالالارداعى جۇيەلى وزگەرىستەرگە نەگىز بولاتىن ماسەلەلەر كوتەرىلگەنىن ايتتى. ول مەملەكەت باسشىسىنىڭ سويلەگەن ءسوزىن باعدارلامالىق ماڭىزعا يە دەپ باعالاپ، پرەزيدەنت ۇسىنعان باسىم باعىتتار ەلدىڭ رۋحاني جاڭعىرۋىمەن تىعىز بايلانىستى ەكەنىن اتاپ ءوتتى.
"قۇرىلتاي – تەك پىكىر الماسۋ الاڭى عانا ەمەس، بۇل – ەلدىك ماسەلەلەردى شەشۋدىڭ، جاڭعىرۋدىڭ جانە جاڭارۋدىڭ ناقتى جولى"، – دەدى مەرەكە قۇلكەنوۆ.
قۇرىلتايدا ايتىلعان ۇسىنىستاردىڭ مەملەكەت دەڭگەيىندە قولداۋ تابۋى، اسىرەسە ونوماستيكا سالاسىن جەتىلدىرۋ، الەۋمەتتىك كەسەلدەرمەن كۇرەس، ازاماتتىق قوعامدى دامىتۋ، قوعامدىق سانا مەن قۇندىلىقتاردى جاڭعىرتۋ سىندى باعىتتاردىڭ وزەكتىلىگىنە توقتالدى.
قالامگەرلەردىڭ پىكىرلەرى: ۇلتتىق قۇندىلىقتاردى ساقتاۋ – باستى مىندەت
جيىندا ءسوز العان جازۋشىلار مەن ادەبيەتتانۋشىلار – كادىربەك سەگىزبايەۆ، قۋاندىق تۇمەنباي، جۇسىپبەك قورعاسبەك، قۇديار ءبىلال، باقىتجان قاناپيانوۆ، الماس احمەتبەك، سونداي-اق سىنشىلار قانسەيىت ابدەز ۇلى مەن ءاليا بوپەجانوۆا ەلدىڭ رۋحاني دامۋىندا قالامگەرلەردىڭ ورنى ەرەكشە ەكەنىن اتاپ ءوتتى.
ولار قوعامدا ءجيى كەزدەسەتىن الاياقتىق ارەكەتتەر، تەرىس ءدىني اعىمدار، ۇلتتىق بولمىسقا جات يدەولوگيالار سياقتى كەرى قۇبىلىستارعا قارسى كۇرەستە شىعارماشىلىق قاۋىمنىڭ بەلسەندى بولۋى ءتيىس ەكەنىن جەتكىزدى. سونىمەن قاتار، وتاندىق كينو مەن انيماسيا وندىرىسىنە يدەولوگيالىق تۇرعىدان ساپالى مازمۇن ەنگىزۋدىڭ ماڭىزدىلىعى ايتىلدى.
پرەزيدەنت ءسوزى – باعىت بەرۋشى قۇجات
قالامگەرلەر قاسىم-جومارت توقايەۆتىڭ:
«ءبىز بارشاعا جانە اركىمگە زور مۇمكىندىك بەرەتىن مەملەكەت قۇرىپ جاتىرمىز. بۇل – ءار ازامات ءوز قابىلەتىن شىڭداپ، ادال ەڭبەگىمەن وتباسىن اسىراي الاتىن ەل بولۋ دەگەن ءسوز. زاڭ جانە ءتارتىپ – ءبىزدىڭ مىزعىماس تۇعىرىمىز. ال ءبىزدىڭ يدەولوگيامىز – جاھانداعى اسا كۇردەلى گەوساياسي احۋالدا ەلىمىزدى جاڭا دامۋ دەڭگەيىنە كوتەرۋ ءۇشىن بەرىك نەگىز قالاۋ» دەگەن ءسوزىن ەرەكشە مانمەن قابىلدادى.
بۇل مالىمدەمە ەل دامۋىنىڭ جاڭا كەزەڭىنە سەرپىن بەرەتىن نەگىزگى ۇستانىم رەتىندە باعالانىپ، ادىلەتتى ءارى ءقاۋىپسىز قوعام قۇرۋ جولىندا بارلىق ازاماتتاردىڭ بەلسەندى ءرول اتقارۋى قاجەتتىگىن كورسەتتى.
قالامگەرلەر مەن شىعارماشىلىق ينتەلليگەنسيا وكىلدەرىنىڭ وي-پىكىرى ەل بولاشاعى ءۇشىن ماڭىزدى يدەولوگيالىق، مادەني، الەۋمەتتىك ماسەلەلەردى كوتەرىپ، ۇلتتىق قۇندىلىقتاردى ساقتاپ، جاڭعىرتۋعا باعىتتالعان ناقتى ۇسىنىستارمەن تولىقتى. ۇلتتىق قۇرىلتايدا ايتىلعان يدەيالار مەن باستامالار – جاڭا قازاقستاندى قالىپتاستىرۋ جولىنداعى ناقتى قادامداردىڭ كورىنىسى.