ۇلتتىق قاۋىپسىزدىك كوميتەتىنىڭ (ۇقك) بۇرىنعى ءتوراعاسى، سوتتالعان كاريم ءماسىموۆتىڭ ۇيىنەن الىنعان قىمبات بۇيىمدار 7 قازاندا وتكەن اۋكسيوندا ساتىلدى، - دەپ حابارلايدى اqshamnews.kz ءتىلشىسى.
قايتارىلعان اكتيۆتەردى باسقارۋ كومپانياسى (قابك) 10 ءتۇرلى قىمبات زاتتى ساۋداعا شىعاردى. ولاردىڭ ىشىندە كوللەكسيالىق قالامدار، مونەتالار، قىلىشتار، قانجارلار جانە ۇلتتىق ورنەگى بار بەلدىك بار.
قۇجاتتاردا بۇل زاتتاردىڭ سيپاتتاماسى كاريم ءماسىموۆتىڭ ەرەكشە ۇيىمەن سايكەس كەلەتىن نىساننان الىنعان مۇلىك رەتىندە كورسەتىلگەن.
ساۋداعا قويىلعان زاتتاردىڭ جالپى قۇنى 3،5 ميلليون تەڭگەدەن استى.
نە ساتىلدى؟
اۋكسيون 7 قازاندا ساعات 12:00-دە ەلەكترون ساۋدا الاڭىندا ءوتتى. ون لوتتىڭ جەتەۋى ساتىلدى.
ساتىلعان قىمبات زاتتار:
-
Montegrappa Italia جازۋ قالامى (كۇمىس، 925 سىناما) 440 مىڭ تەڭگەگە ساتىلدى؛
-
Visconti Firenze قالامى (قۇران سۇرەلەرىمەن ورنەكتەلگەن) 402 مىڭ تەڭگەگە ساتىلدى.
سونداي-اق، ساتىلعان قارۋ-جاراقتار:
-
سۇيەك سابى مەن تىزبەگى بار قىلىش – 930 مىڭ تەڭگەگە؛
-
سارى مەتالمەن ورنەكتەلگەن قىلىش – 837 مىڭ تەڭگەگە؛
-
بولات قانجار (قىنابىمەن بىرگە) – 185 مىڭ تەڭگەگە.
فوتو: e-qazyna.kz
كوللەكسيالىق مونەتالار دا ساتىلدى:
-
"الما وتانى"، "استانا"، "بايتەرەك" جانە "قازاقستان كارتاسى" مونەتالارىنىڭ جيىنتىعى – شامامەن 199 مىڭ تەڭگەگە؛
-
تاعى ەكى مونەتا – 1000 تەڭگەلىك (2003 جىلعى) جانە "ەۋرازيا ەلدەرىنىڭ استانالارى" 500 تەڭگەلىك (2008 جىلعى) – 82 999 تەڭگەگە ساتىلدى.
فوتو: e-qazyna.kz
نە ساتىلماي قالدى؟
كەيبىر لوتتار ساتىلماي قالدى:
- ءۇش مونەتادان تۇراتىن جيناق: "التىن ادام" جانە "تاۋەلسىزدىككە 20 جىل" (500 تەڭگەلىك، 2011 ج.) – باستاپقى باعاسى 155 مىڭ تەڭگەدەن؛
-
"شىعىس كۇنتىزبەسى" جانە "قازاقستان فاۋناسى" سەرياسىنداعى مونەتالار (500 تەڭگەلىك، 2010–2011 جج.) – 107 مىڭ تەڭگەدەن؛
-
قوراپتاعى بىلعارى بەلدىك – 183 750 تەڭگە.
فوتو: e-qazyna.kz
ايتا كەتەيىك، قابك وسىمەن ەكىنشى رەت زاتتاردى ساتۋعا تالپىندى. العاشقىسى 16 قىركۇيەكتە وتكەن، ءبىراق سول كەزدە ساتىپ الۋشىلار تابىلماعان ەدى.