ا.چەحوۆ اتىنداعى ورتالىق كىتاپحانادا تانىمال قازاق جازۋشىسى، پروزايك، قازاقستان جازۋشىلار وداعىنىڭ مۇشەسى ماقان جۇماعۇلوۆتىڭ 100 جىل- دىعىنا ارنالعان «قالام مەن قارۋدى قاتار ۇستاپ...» اتتى ادەبي كەش ءوتتى. ادەبي كەشتى قازاقستان جازۋشىلار وداعى ءتوراعاسىنىڭ ورىنباسارى بەيبىت سارىباي اشىپ، جۇرگىزىپ وتىردى.
ءتوراعا ورىنباسارى ساۋلەلى عۇمىرىن قازاق جازۋشىلارىنىڭ شىعارمالارىن ورىس تىلىنە اۋدارىپ، ولاردىڭ وداققا تانىمال بولۋىنا كۇش سالعان قالامگەردىڭ ەرەن ەڭبەگىن كەڭىنەن اتاپ ءوتتى. تانىمال جازۋشىنىڭ بالالىق شاعىنان باستاۋ الىپ، ونىڭ ءومىر جولىن قامتىعان دەرەكتى فيلم دە جازۋشىنى تەرەڭ تانۋعا مۇمكىندىك بەردى.
قالامگەر جازۋشى ماقان جۇبانىش ۇلى 1924 جىلدىڭ 20 قازانىندا الماتى وبلىسىنىڭ شەلەك اۋدانىنا قاراستى كيىكباي اۋلىندا ومىرگە كەلەدى. جاستايىنان تاعدىرى قيىنشىلىققا تولى قاعىلەز ۇلعا ءتاڭىر سان قىرلى تالانتتى دا قوسا بەرەدى. ونىڭ بويىندا ەرەكشە دارىنى باسىم بولىپ، كەرەمەت سۋرەت سالۋ ونەرىن مەڭگەردى. سۋرەت سالۋعا دەگەن قۇشتارلىعى ونىڭ الماتى كوركەمسۋرەت ۋچيليششەسىنە وقۋعا تۇسۋىنە مۇمكىندىك بەرەدى. وسى ارادا تۇتقيىلدان باستالعان سۇم سوعىس ونىڭ وقۋىن تولىق بىتىرۋىنە كەدەرگى كەلتىرەدى.
دەگەنمەن، ەكىنشى دۇنيەجۇزىلىك سوعىستان ەلگە امان ورالىپ، اتالمىش ۋچيليششەنى ءتامامدايدى. ماقان جۇبانىش ۇلى ەكىنىڭ ءبىرى باتىلى بارىپ، قولى جەتە بەرمەيتىن ماسكەۋدەگى ادەبيەت ينستيتۋتىن دا ويداعىداي بىتىرەدى. ول ءوزىنىڭ ەڭبەك جولىندا مەكتەپتە ءمۇعالىم، «ۋچيتەل كازاحستانا» گازەتىندە ادەبي قىزمەتكەر، «جازۋشى»، «قازاقستان» باسپالارىندا رەداكتور، «اۆتورلىق قۇقىق قورعاۋ جونىندەگى بۇكىلوداقتىق اگەنتتىگىنىڭ قازاق رەسپۋبليكاسى بولىمشەسىندە ينسپەكتور، اعا ادەبي كەڭەسشى قىزمەتتەرىن اتقارادى. شىعارمالارىن ورىس تىلىندە جازعان جازۋشىڭىڭ سوڭىندا مول مۇرا قالدى. ونىڭ تۇڭعىش «قاراتورعاي» ولەڭدەر جيناعى «قازاقستان» (قازىرگى «پروستور» جۋرنالى) الماناحى مەن «لەنينسكايا سمەنا» گازەتىندە جاريالانادى.
جازۋشىنىڭ «قىران قازاسى قيادا» رومانى ۇلت-ازاتتىق كوتەرىلىسىنىڭ باسشىسى بولعان امانگەلدى يمانوۆتىڭ ەرلىگىنە قويىلعان ەسكەرتكىش ىسپەتتى. سونداي-اق، جازۋشىنىڭ بالالارعا ارنالعان «ءسوز كىتابى»، «دنەپرگە» پوۆەسى، «پيما-ەرتەگى»، «كوڭىلدى بەس ءجۇزىنشى» پوۆەستەرى مەن اڭگىمەلەر جيناعى جارىق كوردى. جاۋىنگەر جازۋشىنىڭ ەرلىگى ەل ەسىندە ساقتالىپ، وردەن-مەدالدارمەن، ەكى مارتە قازاقستان جوعارى كەڭەسىنىڭ قۇرمەت گراموتاسىمەن، ورتا ازيا اسكەري وكرۋگىنىڭ قۇرمەت گراموتاسىمەن ماراپاتتالدى.مىنە، ەرلىك جولى دا، ەڭبەك جولى دا جاس ۇرپاققا ۇلگى بولاتىن ماقان جۇبانىش ۇلىنىڭ ءومىرى وسىلاي ورىلگەن. ارنايى كەلگەن كوزكورگەندەر جازۋشىنىڭ ەسىمىن ەستە قالدىرۋ ءۇشىن مەكتەپكە، كوشەگە ەسىمى بەرىلسە دەگەن تىلەكتەرىن دە جەتكىزدى.
كەزدەسۋدە جازۋشى زەينەپ احمەتوۆا ماقان جۇماعۇلوۆ باتىر باۋىرجاننىڭ تالاي ەڭبەگىن اۋدارىپ، ريزاشىلىعىنا بولەنگەنىن ەسكە السا، جازۋشىنىڭ جان جارى باتي جۇماعۇلوۆا، قىزدارى زۋرا، ايگۇل جۇماعۇلوۆالار اكەگە دەگەن ساعىنىشقا تولى ەستەلىكتەرمەن ءبولىستى.