الماتىدا جەڭىستىڭ 79 جىلدىعىنا وراي قازاقستان جازۋشىلار وداعىنىڭ باسقارما ءتوراعاسى مەرەكە قۇلكەنوۆ باستاعان ءبىر توپ زيالى قاۋىم مايدانگەر جازۋشىلاردىڭ وتباسىنا ارنايى بارىپ، جەڭىس كۇنى مەرەكەسىمەن قۇتتىقتادى، دەپ حابارلايدى اlmaty-akshamy.kz.
الدىمەن جازۋشىلار وداعىنىڭ باسقارما ءتوراعاسى مەرەكە قۇلكەنوۆ 28 پانفيلوۆشىلار پاركىنە بارىپ، ەل باسىنا كۇن تۋعان ساتتە كەرزى ەتىگىمەن سۋ كەشىپ، وتان ءۇشىن جانىن پيدا ەتكەن قارت مايدانگەرلەردىڭ رۋحىنا تاعزىم ەتىپ، گۇل شوقتارىن قويدى. سونان كەيىن، جۇبان مولداعالييەۆ تۇرعان ۇيگە بەت بۇردى. مۇندا قالامگەردىڭ اسىل جارى سوفيا اپاي كۇتىپ الدى. تىل-كوزدەن ساقتاسىن، 94-كە كەلسە دە سوفيا اپا تىڭ. وتكەن كۇندەرگە شەگىنىس جاساپ، ەستەلىكتەرىمەن ءبولىستى. 
«ءبىز جاس كەزىمىزدە زامان قيىنداۋ بولدى. ول كەزدە نان قات ەدى. وكىمەت التى ءجۇز گرامم نان بەرەدى. ونى ءبىز كوك بازارعا بارىپ، جۇگەرىگە اۋىستىرىپ الامىز. ءسويتىپ سودان جاسالعان تاعامدى تالقاجاۋ ەتۋشى ەدىك. باسىمىزدان قيىن كەزدەر ءوتتى عوي. ءقازىر بەيبىتشىلىك زامان عوي. شۇكىر اللاعا! جۇمىستارىڭىزعا ساتتىلىك تىلەيمىن! بىرنەشە ۋاقىتتان ۇزىلگەن ءداستۇردى قايتا قولعا الىپ، بىزدەردى ەلەپ ەسكەرىپ جاتقاندارىڭىزعا العىس بىلدىرەمىن»، - دەپ اعىنان جارىلدى.
مۇنان كەيىن، «پارتيزان قىزى»، «ورمانداعى وت»، «تون»، «قاپاستاعى جۇلدىزدار» اتتى شىعارمالاردىڭ اۆتورى، قازاقستان جازۋشىلار وداعى باسقارماسىنىڭ ءبىرىنشى حاتشىسى جانە كسرو جازۋشىلار وداعىنىڭ حاتشىسى، پارتيزان-جازۋشى ءادي ءشارىپوۆتىڭ ۇيىنە باردى. مۇندا دا جازۋشىنىڭ اسىل جارى كلارا اپاي ارنايى كەلگەن قوناقتاردى تىك تۇرىپ قارسى الدى. وسىناۋ مەرەكەدە ارنايى اتباسىن تىرەگەن جازۋشىلار وداعىنىڭ سونى باستاماسىنا ءوزىنىڭ ءدان ريزا ەكەندىگىن جەتكىزدى. اق باتاسىن بەرىپ، شىعارىپ سالدى. 
وسىدان كەيىن قازاق ەلىنىڭ ماقتانىشى، بىلىكتى قولباسشى بولعان باۋىرجان مومىش ۇلىنىڭ وتباسىنا كىرىپ، باتىردىڭ كەلىنى زەينەپ اپانى ارنايى قۇتتىقتادى.
-مەنىڭ ىستەپ جۇرگەنىم اماناتقا ادالدىق تانىتۋ. اتام - شەجىرە ادام ەدى. ماعان كوپ اڭگىمە ايتتى. «مەن ساعان ايتسام، قۇلاعى بار دەپ ايتامىن. سەن بالاڭا ايتاسىڭ. بالاڭ ارى قاراي جالعايدى. وسىلايشا قازاقتىڭ ءبىر شاڭىراعى ساقتالادى»،-دەيتىن. مىنە، ءقازىر اتانىڭ ايتقاندارىن ەلگە ايتىپ، تاربيەگە كەرەك بولار تۇستارىن ءسوز ەتىپ ءجۇرمىز. ءوسىرىپ جاتقان بالا-شاعالارىڭىز تاربيەلى، ۇلت ءۇشىن جانىن بەرەر ازامات بولسىن! – دەدى باتىردىڭ كەلىنى اعىنان جارىلىپ.
باتىردىڭ ۇيىنەن ارقالانىپ شىققان جازۋشىلار ات باسىن توقسانعا كەلگەنشە قالامى قولىنان تۇسپەي، ىرگەلى دۇنيەلەر جازىپ كەتكەن ءابۋ سارسەنبايەۆتىڭ ۇيىنە بۇردى. ايتۋ كەرەك، قالامگەر تەك جازۋمەن عانا شۇعىلدانىپ قويماي، اتىراۋ وبلىسىمەن شەكتەسەتىن رەسەيدىڭ استراحان وبلىسىن ارالاپ شىققان. وندا قازاقتار كوپ ەكەنىن، ولاردىڭ قارىنى توق، كويلەگى كوك بولعانىمەن، ۇلتتىق مەكتەپتەرى جوق ەكەنىن ايتىپ، باسپاسوزدە سيكلدى ماقالالار جازىپ، ماسەلەنى دەر كەزىندە كوتەرىپ، سول جاقتان قازاق مەكتەپتەرىنىڭ اشىلۋىنا مۇرىندىق بولعان. قازاقستاننان كىتاپ، وقۋلىقتار جىبەرتكىزىپ، استراحان تەلەارناسىنان قازاقشا حابارلار بەرۋگە ىقپال ەتكەن. مىنە، ناعىز قايراتكەر، ەلجاندى ادامنىڭ شاڭىراعىنىڭ ءتۇتىنى ءتۇزۋ شىعۋعا ۇلەس قوسقان اسىل جارى رايحان اپاي كىشكەنە سىر بەرە باستاعانداي كورىندى. دەسەكتە، قۇرمەت كورسەتىپ كەلگەن قوناقتارعا العىسىن بىلدىرگەن كەلىنى ساليما كەلەر جىلى جازۋشىنىڭ 120 جىلدىعىن ءوز دەڭگەيىندە اتاپ ءوتۋدى ءوتىندى. قازاقستان جازۋشىلار وداعىنىڭ باسقارما ءتوراعاسى مەرەكە قۇلكەنوۆ بۇل جايىندا حاباردار ەكەنىن جەتكىزدى. جانە، مەرەيتويعا دايىندىق جۇمىستارى باستاۋ العانىن دا ايتتى. 
- بۇگىن ەلىمىزدىڭ بارلىق وڭىرلەرىندە جەڭىس مەرەكەسى ءتيىستى دەڭگەيدە اتاپ ءوتىپ جاتىر. ەندى قالام مەن قارۋدى قاتار ۇستاعان جازۋشىلارىمىزدىڭ كوپ ەمەس. سولاردىڭ ۇيىندەگى جارلارىنا كىرىپ، ارنايى قۇتتىقتاپ شىعۋدىڭ ءوزى ۇلكەن تاربيە. كەشەگى قالامگەرلەردىڭ ءتۇتىنىن ءتۇزۋ شىعارىپ وتىرعان اپالارىمىزدى ارنايى قۇتتىقتاپ، كوڭىلدەرىن كوتەردىك. قازاق كوڭىل كوڭىلدەن سۋ ىشەدى دەمەي مە؟ ەندەشە بىر-بىرىمىزگە دەمەۋ بەرۋ، قالىن سۇراۋ بابالاردان كەلە جاتقان ءداستۇر، دەدى قازاقستان جازۋشىلار وداعىنىڭ باسقارما ءتوراعاسى مەرەكە قۇلكەنوۆ.
