الماتىدا جولاۋشىلار تاسىمالىمەن زاڭسىز اينالىساتىن شەتەلدىكتەر ىزدەستىرىلىپ جاتىر.
پروفيلاكتيكالىق ءىس-شارا باستالعالى بەرى شەتەلدىكتەر 217 مارتە جول ەرەجەسىن بۇزعانى انىقتالدى. ونىڭ ىشىندە تاجىكستان ازاماتتارى 44 رەت جول ەرەجەسىن بۇزعان. بۇل تۋرالى الماتى قالالىق پوليسيا دەپارتامەنتىنىڭ جەرگىلىكتى پوليسيا قىزمەتى باسقارماسى باستىعىنىڭ ورىنباسارى، پوليسيا پولكوۆنيگى دياس دۋانبەكوۆ ايتتى.
«مامانداندىرىلعان ايىپپۇل تۇراعىنا 79 اۆتوكولىك قويىلدى. شەتەلدىكتەردىڭ جەكە تاسىمالداۋ قىزمەتىن كورسەتۋ دەرەكتەرىن انىقتاۋعا ەرەكشە نازار اۋدارىلدى. سوڭعى تاۋلىكتە وسىعان ۇقساس 3 دەرەك انىقتالدى. تاجىكستان ازاماتتارى ءموبيلدى رەسۋرس ارقىلى زاڭسىز جولاۋشىلار تاسىمالىمەن اينالىسقان. قۇقىقبۇزۋشىلىقتىڭ بولۋ سەبەپتەرى مەن شارتتارىن جويۋ جونىندە اتالعان جشس-عا ۇسىنىس ەنگىزىلدى»، — دەدى ول.
سونداي-اق پوليسيانىڭ مالىمەتىنشە، شەتەلدىك جۇمىس كۇشىن زاڭسىز تارتقانى ءۇشىن قالالىق تاكسوپاركتەردىڭ ءبىرىنىڭ باسشىلىعى اكىمشىلىك جاۋاپقا تارتىلدى.
«جەرگىلىكتى پوليسيا قىزمەتىنىڭ وكىلدەرى ءوز قۇزىرەتىنە سايكەس انىقتالعان زاڭ بۇزۋشىلىقتار بويىنشا ماتەريالداردى الماتى قالاسىنىڭ كولىكتىك باقىلاۋ ينسپەكسياسىنا جىبەردى»، — دەپ حابارلادى قالالىق پوليسيا دەپارتامەنتىنىڭ باسپا ءسوز قىزمەتى.