الماتىنىڭ جاسىل ەكونوميكا باسقارماسى بۇل اقپاراتتى جوققا شىعاردى.
تانىمال قازاقستاندىق سپورتشى قۋات حاميتوۆ ءوزىنىڭ Instagram پاراقشاسىندا قاراڭعى ۋاقىتتا جول بويىندا ءوسىپ تۇرعان اعاشتاردى سۋارىپ كەلە جاتقان تراكتوردىڭ ۆيدەوسىن جاريالاعان. كادر سىرتىنداعى داۋىس ادامداردى وسىلاي «ۋلايدى»، ادامداردىڭ اۋىراتىنى دا سوندىقتان دەيدى. بۇل جالعان، دەپ حابارلادى stopfake.kz.
الماتىنىڭ جاسىل ەكونوميكا باسقارماسى بۇل اقپاراتتى جوققا شىعاردى.
– جوعارىدا كورسەتىلگەن مەكەنجاي بويىنشا «دەزينفەكسيا» مەكەمەسى جاسىل جەلەكتەردى زيانكەستەردەن بيولوگيالىق پرەپاراتتارمەن وڭدەۋ بويىنشا جۇمىستار جۇرگىزۋدە. جۇمىس ءتيىمدى بولۋى ءۇشىن تۇنگى ۋاقىتتا جۇرگىزىلەدى، ويتكەنى بيولوگيالىق پرەپارات ۋلتراكۇلگىن ساۋلەلەردىڭ اسەرىنەن تيىمدىلىگىن جوعالتادى، – دەپ جازدى دەپارتامەنت وكىلدەرى سپورتشىنىڭ پاراقشاسىنداعى پوستقا قاتىستى جازعان پىكىرىندە.
الماتى قالاسىنىڭ سانيتارلىق-ەپيدەميولوگيالىق باقىلاۋ دەپارتامەنتى دە تۇسىنىكتەمە بەردى. ۆەدومستۆو اعاشتاردى زيانكەستەر مەن اۋرۋلاردان قورعاۋ بويىنشا ءىس-شارالار قالادا جىل سايىن وتكىزىلەدى جانە بۇل ءۇشىن ەڭ ءتيىمدى قۇرالداردىڭ ءبىرى بيوپرەپاراتتار بولىپ تابىلاتىنىن حابارلادى.
– بيولوگيالىق ونىمدەر – ءتىرى ورگانيزمدەر نەمەسە ءتىرى ورگانيزمدەر سينتەزدەيتىن تابيعي بيولوگيالىق قوسىلىستار. بيولوگيالىق پرەپاراتتاردىڭ سپەكترى بيوينسەكتيسيدتەردەن، بيوفۋنگيسيدتەردەن بيو-تىڭايتقىشتارعا دەيىن وتە اۋقىمدى. ساڭىراۋقۇلاقتارعا نەگىزدەلگەن بيوپەستيسيدتەر تامىر، تۇقىم جانە توپىراق ينفەكسياسىنىڭ قوزدىرعىشتارىن باسۋعا، سونداي-اق پرەپاراتتى تىكەلەي بەتىنە قولدانعان كەزدە جەمىس پەن جاپىراق اۋرۋلارىنىڭ دامۋىنا جول بەرمەيدى. بيولوگيالىق ينسەكتيسيدتەر ءتورت ءجۇز ءتۇرلى جاندىكتەرگە قارسى ءتيىمدى. پرەپاراتتىڭ اسەرى قاراپايىم – ىشكى اعزالاردى زاقىمدايدى، جاندىكتەردىڭ سال اۋرۋىنا جانە ولىمىنە اكەپ سوقتىرادى، – دەلىنگەن الماتى قالاسىنىڭ سانيتارلىق-ەپيدەميولوگيالىق باقىلاۋ دەپارتامەنتىنىڭ تۇسىنىكتەمەسىندە.
ارالاس جەكپە-جەك جاۋىنگەرى قۋات حاميتوۆ بۇعان دەيىن جالعان اقپارات تاراتقان بولاتىن. ءوزىنىڭ Instagram پاراقشاسىندا ول COVID-ديسسيدەنتتەردى بەلسەندى تۇردە قولداپ، اۋرۋدىڭ بار ەكەنىن جوققا شىعاردى.