الماتى - مىڭ بوياۋلى قالا.
شاھار تۋىن جەلبىرەتكەن جاستار ەلەكتروساموكاتپەن مەگاپوليستىڭ باستى كوشەلەرىمەن 40 شاقىرىم جولدى ءجۇرىپ ءوتتى، دەپ حابارلايدى Almaty-akshamy.kz Almaty.tv-گە سىلتەمە جاساپ.
ەتنومادەني بىرلەستىكتىڭ وكىلدەرى قالا كۇنىن مەرەكەلەۋ اياسىندا مەگاپوليستەگى كورىكتى ورىندارعا بارىپ، سەلفي ەكسكۋرسيا جاسادى. ەلەكتروساموكات مىنگەن جاستار تاۋەلسىزدىك مونۋمەنتى، ۇلى اباي مەن قۇرمانعازىنىڭ ەسكەرتكىشىنە، قالانىڭ كونە عيماراتتارى مەن باستى ساياباقتارىنا ات باسىن بۇرىپ، شاھار تۋىن جەلبىرەتىپ سۋرەتكە ءتۇستى.
شاھار تۋىن جەلبىرەتكەن جاستار ەلەكتروساموكاتپەن مەگاپويستىڭ باستى كوشەلەرىمەن 40 شاقىرىم جولدى ءجۇرىپ ءوتتى. جاستار رەسپۋبليكا الاڭىنداعى تاۋەلسىزدىك مونۋمەنتىنەن شىعىپ، دوستىق ءۇيى، قازاقستان ءقوناقۇيى، رەسپۋبليكا سارايى سىندى 7 مەكەنجايعا باردى.
«الماتى - مىڭ بوياۋلى قالا. بۇل ءاربىر قوناقتىڭ جۇرەگىندە ءىز قالدىراتىن جارقىن شاھار دەر ەدىم. اكسيانى قازاقستان حالقى اسسامبلەياسىنا مۇشە جاستار ۇيىمداستىرىپ وتىرمىز. وسى ءىس-شارانى جىل سايىنعى داستۇرگە اينالدىرعىمىز كەلەدى. سەبەبى ءقازىر، وزدەرىڭىز بىلەتىندەي، ەلەكتروساموكاتپەن قوزعالاتىن تۇرعىندار كوبەيدى. سونداي-اق، بۇل ەكولوگيالىق ترانسپورت ءتۇرى»، - دەدى «قازاقستان ۇيعىر جاستارىنىڭ وداعىنىڭ» ءتوراعاسى رۋستام قايىريەۆ.
دەنيەل دجەيمس الماتىدا ءتۋىپ-وستى. افريكالىق ەتنومادەني قوعامداستىقتىڭ ءتوراعاسى قازاق تىلىندە ەركىن سويلەيدى. ايتۋىنشا، باسقا جاققا قونىس اۋدارۋ ويى جوق. الماتىنىڭ اسپانمەن تالاسقان زاڭعار تاۋلارى، سان قۇبىلعان اۋا رايى جانە تابيعاتىنىڭ كەرەمەتتەي كورىنىسى ۇنايدى ەكەن.
«الماتى قالاسىندا تۋىپ ءوستىم. ول - مەنىڭ ەڭ سۇيىكتى قالام. نەگە دەسەڭىز، ويتكەنى 4 مەزگىل بار. قىستا قار جاۋىپ تۇر. افريكالىق ادامدارعا ول ەرەكشە نارسە. كوكتەمدە ءبارى گۇلدەنەدى. جازدا ىستىق افريكاداعى سياقتى. كۇزدە مىناۋ تابيعات، جاپىراقتار سارعايادى، سونداي ادەمى تابيعات. ءبىر قادام باسىپ، تاۋعا شىعۋعا مۇمكىندىك بار. قانداي بيىك تاۋلارىمىز بار»، - دەدى افريكالىق ەتنومادەني قوعامداستىقتىڭ باسشىسى دەنيەل دجەيمس.
«وقۋ ىزدەپ كەلگەن مەن وسى قالاعا عاشىق بولىپ، وسىندا قالۋدى ۇيعاردىم. الماتى - وتە اسەم، تازا قالا. ءوزىنىڭ اتموسفەراسىمەن باۋراپ الاتىن ەرەكشە قالا دەپ ايتسام بولادى. باسقا قالالارعا قاراعاندا وزىمە الماتى قاتتى ىستىق»، - دەدى ورىس ەتنومادەني بىرلەستىگىنىڭ مۇشەسى گالينا سەرگەيەۆنا.
ولاردىڭ فوتوسۋرەتتەرى مەن شاھارعا ارناعان جۇرەكجاردى تىلەكتەرىن الەۋمەتتىك جەلىلەردە الماتى سۇيىكتى قالا حەشتەگى ارقىلى تابۋعا بولادى. ەكسكۋرسيا قاتىسۋشىلارى بارشا الماتىلىقتاردى اكسياعا قاتىسۋعا شاقىرادى.
اكسيا وسى ورتالىق دەمالىس ساياباعىندا ءتامامدالدى. قالاداعى ءىس-شارالار بۇنىمەن عانا توقتاپ قالمايدى. ۇيىمداستىرۋشىلار الداعى كۇندەرى دە كورنەكى ورىندارعا بارىپ، قالا تۇرعىندارى مەن قوناقتارىنا مەرەكەلىك كوڭىل كۇي سىيلايدى.