مۇنداي شەكتەۋ تۇنگى ۋاقىتتا جۇرەتىن موتوسيكلشىلەرگە قاتىستى بولماق
الماتىدا تۇنگى ۋاقىتتا موتوسيكل قوزعالىسىن شەكتەۋ قاراستىرىلۋدا، دەپ حابارلايدى Almaty-akshamy.kz Almaty.tv سايتىنا سىلتەمە جاساپ.
وعان بۇل ترانسپورت يەلەرىنىڭ قالا كوشەلەرىندە ەركىن قوزعالىپ، جاڭعىرعان دىبىسىمەن الماتىلىقتاردىڭ ءتۇن ۇيقىسىن ءبولۋى سەبەپ بولعان. ەگەر ءتيىستى قاۋلى كۇشىنە ەنسە، قوس دوڭگەلەكتى كولىكتىڭ قوزعالىسىنا تۇنگى ساعات 10-نان تاڭعى 9-عا دەيىن تىيىم سالىنادى.
الماتىدا 6،5 مىڭداي موتوسيكل رەسمي تىركەلگەن. ولاردىڭ قوزعالىسىنان ءتۇن ۇيقىمىز ءتورت بولىنەدى دەپ شاعىمداناتىن قالا تۇرعىندارىنىڭ سانى دا ارتقان. بۇل رەتتە قالالىق اكىمدىك پەن پوليسيا دەپارتامەنتى موتوسيكل قوزعالىسىن تۇنگى ۋاقىتتا شەكتەۋدى ۇسىندى. بۇل باستامانى الماتىلىقتاردىڭ باسىم بولىگى قولداپ وتىر.
«تۇنگى ساعات 11-دەن كەيىن ادامدار دەمالادى، ۇيىقتايدى. ولار دارىلداتىپ، ۇيقى دا، مازا دا بەرمەيدى. سوندىقتان وسى شەشىم وتە دۇرىس بولدى»، – دەيدى قالا تۇرعىنى تەمىرحان قاپتاعايەۆ.
«مەن تۇراتىن ءۇيدىڭ كوشەسىندە موتوسيكلدەر كوپ جۇرەدى. اسىرەسە، كەشكى ۋاقىتتا ادامنىڭ ۇيقىسىن بۇزادى. ادام جاقسى ۇيىقتاپ تۇرۋى كەرەك»، – دەيدى تاعى ءبىر تۇرعىن قوساي ايتبەك.
ال قوس دوڭگەلەكتى كولىك يەلەرىنىڭ بۇعان ءوز ءۋاجى بار. ايتۋلارىنشا، ەگەر مۇنداي قاۋلى كۇشىنە ەنسە، ولاردىڭ قۇقىعى تاپتالادى. «شۋلاپ جۇرگەن ءبىز عانا ەمەسپىز» دەگەن بايكەرلەر ءوز پەتيسياسىن قۇرماق نيەتتە.
«دىبىستىق رەجيمدى تەك بايكەرلەر بۇزادى دەۋ ميعا سىيمايتىن نارسە. بىزدە باسقا دا ەرەكشە ترانسپورت ءتۇرىن تىزگىندەگەن تۇرعىندار كوپ. ونىمەن قوسا، ارنايى قاتتى شۋلايتىن تەحنيكالار دا بار. وندا ولارعا دا تىيىم سالىنسىن. مەگاپوليستە تولىعىمەن تىنىش بولۋى مۇمكىن ەمەس. مۇنىمەن اركىم جەكە كۇرەسۋى كەرەك»، – دەيدى قالا تۇرعىنى يۆان نيەۆيانسيەۆ.
قالالىق موبيلدىلىك باسقارماسىنىڭ باستاماسىمەن بۇل ماسەلەنى كولىك جانە كوممۋنيكاسيا عىلىمي زەرتتەۋ ينستيتۋتى جان-جاقتى زەرتتەپ كوردى. ورتا ەسەپپەن ءاربىر موتوسيكلدىڭ دىبىس دەڭگەيى 81 مەن 89 دەسيبەل اراسىندا ەكەن. عالىمدار بۇل ادامنىڭ جۇرەك قاعىسىن جيىلەتىپ، قان قىسىمىن كوتەرەدى جانە ەستۋ شەگىن تومەندەتەدى دەگەن توقتامعا كەلگەن.
موتوسيكلدىڭ دىبىس دەڭگەيى ءبىر تاۋلىك بويى ماگيسترالدى جولدار مەن اشىق جانە جابىق تەرەزەلەرى بار بولمەلەردە زەرتتەلدى. اۆتوكولىك تۇرلەرىنىڭ ىشىندەگى ەڭ شۋلىسى – جۇك كولىگى مەن مەن موتوسيكلدەر. ولار ادام اعزاسىنا تەرىس اسەر ەتەدى.
ايتا كەتەتىنى، تۇرعىن ءۇي-جايلاردا ءتىپتى رۇقسات ەتىلگەن نورمادان اساتىن قىسقا مەرزىمدى قاتتى دىبىس دەڭگەيى ادامعا تەرىس اسەر ەتۋى مۇمكىن. اسىرەسە، قارت ادامدار مەن كىشكەنتاي بالالارى بار وتباسىلارعا زيان.
ينستيتۋت عالىمدارى قوس دوڭگەلەكتى كولىكتىڭ قاتىسۋىمەن بولاتىن جول-كولىك اپاتىنىڭ جيىلەپ كەتۋ دەرەگىن دە نەگىزگە الدى. ماسەلەن، سوڭعى 4 جىلدا موتوسيكل سالدارىنان بولاتىن ءولىم-جىتىم سانى 5 پايىزدان 8 پايىزعا ارتقان.
جاڭا قاۋلى ءقازىر اشىق نورماتيۆتىك قۇقىقتىق اكتىلەر پورتالىندا تالقىلانىپ جاتىر. ءاربىر ازامات سايتقا كىرىپ، ءوز پىكىرىن بولىسە الادى. داۋىس بەرۋ 12 قازانعا دەيىن جالعاسادى.