3 تامىز كۇنى كەشكى ۋاقىتتا وبلىستىق پد كريمينالدىق پوليسيا باسقارماسىنىڭ قىزمەتكەرلەرى ءىىم قىلمىستىق-اتقارۋ جۇيەسى كوميتەتىنىڭ جەدەل باسقارما قىزمەتكەرلەرىمەن بىرلەسكەن جەدەل-ىزدەستىرۋ ءىس-شارالارى بارىسىندا قالا شەتىندەگى ورمان القابىنان جاسىرىلعان قارۋ-جاراق پەن وق-دارىلەر تاپتى، – دەپ حابارلايدى Almaty-akshamy.kz Polisia.kz-كە سىلتەمە جاساپ.
وقيعا ورنىنان جەدەل-تەرگەۋ توبى قىزمەتكەرلەرى “بايكال” ماركالى تەگىس ۇڭعىلى مىلتىق، “سوۆاج” ماركالى قوس ۇڭعىلى كارابين، 12 كاليبرلى قوس ۇڭعىلى شولاق مىلتىق، يج-21 تەگىس ۇڭعىلى مىلتىق، ماكاروۆ تاپانشاسى، ءارتۇرلى كاليبرلى 188 بىرلىك وق-دارىلەر جانە ىشىندە 1440 پاترونى بار مورلەنگەن مىرىش قوراپ تاركىلەدى.
قازىرگى ۋاقىتتا تاركىلەنگەن قارۋ-جاراق پەن وق-دارىلەرگە ءتيىستى ساراپتامالار تاعايىندالدى. اتالعان دەرەك بويىنشا قازاقستان رەسپۋبليكاسى قىلمىستىق كودەكسىنىڭ 287-بابى 3-بولىگىنە سايكەس قىلمىستىق ءىس قوزعالدى. اتالعان باپتىڭ سانكسياسىنا سايكەس بەس جىلعا دەيىن باس بوستاندىعىن شەكتەۋگە نە بولماسا سول مەرزىمگە باس بوستاندىعىنان ايىرۋ جازاسى كوزدەلگەن.