الماتى اگلومەراسياسىنىڭ دامۋى
الەمدىك تەندەنسيالار قالالاردى ودان ءارى ۋربانيزاسيالاۋ قاجەتتىلىگىن بايقاتادى. بارلىق ەلدەردە اۋىلدىق اۋماقتار مەن شاعىن قالالاردىڭ حالقى ءىرى مەگاپوليس قالالارىنا كوشىپ، ولاردىڭ اينالاسىندا يادرو قالاسىمەن تىعىز بايلانىستى اگلومەراسيالار قۇرۋدا.
باس جوسپاردى ازىرلەۋشىلەردىڭ الدىندا الماتى وزەك-قالاسى مەن اگلومەراسيانىڭ دامۋىن ۇندەستىرۋ، ولاردى ءبىرتۇتاس ويلاستىرىلعان كولىك قاڭقاسىنا بايلانىستىرۋ، سپۋتنيكتىك قالالار مەن اگلومەراسيانىڭ باسقا دا ەلدى مەكەندەرىن پوليورتالىقتىق دامۋ قاعيداتى بويىنشا دامىتۋدى قامتاماسىز ەتۋ، ازاماتتارىمىزدى الەۋمەتتىك ينفراقۇرىلىممەن جانە قوعامدىق پايدالانۋ ورىندارىمەن قامتاماسىز ەتۋ، سونداي - اق جاڭا جوعارى ءونىمدى جۇمىس ورىندارىن قۇرۋ مىندەتى تۇر.
الماتى تۇرعىندارى جانە اگلومەراسيا تۇرعىندارى اراسىنداعى ءومىر ءسۇرۋ ساپاسىنداعى ديسپروپورسيانى قىسقارتۋ اسا ماڭىزدى ماسەلە بولىپ تۇر.
سوڭعى جىلدارى الماتى اگلومەراسياسىن ءاربىر ەلدى مەكەن مەن اۋدان جەكە وزدەرى، ناقتى باسقارۋ جانە جوسپارلاۋ جۇيەسىنسىز قالىپتاستىرىپ وتىردى. قولدانىستاعى ەلدى مەكەندەرگە اكىمشىلىك اۋماقتاردى بىر-بىرىمەن بايلانىستىرۋعا دەيىن كەڭەيتە وتىرىپ، اۋىل-شارۋاشىلىق قوردىڭ قوسىمشا جەرلەرى قوسىلدى.
بۇگىندە 2 ميلليوننان استام ادام تۇراتىن الماتى – بۇل الماتى اگلومەراسياسىنىڭ وزەگى، ال قالا قۇرىلىسشىلارىنىڭ الدىندا - اگلومەراسيانىڭ باسقارىلاتىن ۋربانيزاسياسىنا قول جەتكىزۋ مىندەتى تۇر.
بۇل مىندەتتى شەشۋ الماتى جانە قونايەۆ قالالارىنىڭ اۋماعىن، سونداي-اق قالا ماڭىنداعى ايماقتى دامىتۋدىڭ باس جوسپارلارى نەگىزىندە ورىندالاتىن بولادى.
قازىرگى ۋاقىتتا مەملەكەت باسشىسىنىڭ تاپسىرماسىنا سايكەس «اگلومەراسيالاردى دامىتۋ تۋرالى» زاڭ قابىلداندى، ول اگلومەراسيالاردىڭ قۇرامىنا كىرەتىن اكىمشىلىك-اۋماقتىق بىرلىكتەر اراسىنداعى قاتىناستاردى رەتتەۋگە باعىتتالعان. سونداي-اق الماتى اگلومەراسياسىن دامىتۋدىڭ ءبىرىڭعاي كەشەندى جوسپارى ازىرلەنۋدە، ول الماتى اگلومەراسياسىنىڭ ناقتى ءىس-شارالارىن قارجىلاندىرۋدىڭ باسىم باعىتتارى مەن كوزدەرىن ايقىندايتىن بولادى.
ورتالىعى قونايەۆ قالاسىندا ورنالاسقان جاڭا الماتى وبلىسىنىڭ دامۋى ۋربانيزاسيا پروسەسىن جەدەلدەتەدى-بولجامدى ەسەپتەۋلەر بويىنشا 2030 جىلعا قاراي الماتى اگلومەراسياسى شامامەن 4،5 ملن ادامدى قۇرايتىن بولادى.
قازىرگى ۋاقىتتا جەدەلدەتىلگەن دامۋ بولجامدارى مەن ۋربانيزاسيا پروسەستەرىن ەسكەرە وتىرىپ، الماتى جانە الماتى وبلىسىنىڭ اكىمدىكتەرى قالا ماڭى ايماعىنىڭ باس جوسپارىن (اۋماقتاردىڭ قالا قۇرىلىسىن جوسپارلاۋدىڭ كەشەندى سحەماسى) وزەكتەندىرۋ بويىنشا بىرلەسكەن جۇمىستاردى جۇرگىزۋدە.