پايدالى جاز: الماتى وقۋشىلارى جانۋارلار الەمى تۋرالى تەگىن ءبىلىم الادى
9-16 جاس ارالىعىنداعى مەكتەپ وقۋشىلارى جازعى ۋاقىتتا زوولوگيانى وقىپ، جانۋارلاردى تاماقتاندىرىپ، قورشاۋىن تازالادى، سونىمەن قاتار قالانىڭ مۋزەيلەرىنە باردى. جاس ناتۋراليستەر ۇيىرمەسىن الماتى حايۋاناتتار باعىنىڭ اكىمشىلىگى ۇيىمداستىردى. زوومەكتەپتەگى ساباقتىڭ ەرەكشەلىگى جانۋارلار الەمىن تەرەڭىرەك زەرتتەۋ جانە ونداعى اڭ-قۇستاردى كوزبەن كورىپ، جاقىنىراق ءتانىپ-بىلۋ.
«بالالار جاز بويى ساباققا قۋانىپ باردى، بۇل زوومەكتەپكە جانە جالپى حايۋاناتتار باعىنا دەگەن قىزىعۋشىلىقتىڭ كورسەتكىشى. ءبىز گەيميفيكاسيا ەلەمەنتتەرىن قولدانامىز، بالالاردىڭ جانۋارلارعا دەگەن قىزىعۋشىلىعى مەن سۇيىسپەنشىلىگىن ارتتىرۋعا تىرىسامىز. جانۋارلار، تابيعات جانە قورشاعان الەم تۋرالى كوبىرەك بىلگىسى كەلەتىن بالالار ءۇشىن ءار سارسەنبى سايىن قوسىمشا تاڭداۋ پاندەرىن وتكىزەمىز. مەكتەپكە بالالاردى وقۋ جىلىنىڭ سوڭىندا – مامىردا قابىلدادىق. ال تامىز ايىنىڭ سوڭىندا ءبىزدىڭ وقۋشىلار ەمتيحان تاپسىرادى، بۇل العان ءبىلىمدى بەكىتۋ جانە وتكەن ماتەريالدى قورىتىندىلاۋ»، - دەدى الماتى حايۋاناتتار باعىنداعى زوومەكتەپتىڭ جەتەكشىسى ليۋبوۆ ساچكوۆا.
ساباق تەگىن، جۇمىس كۇندەرى ەكى تىلدە، ەكى اۋىسىمدا وتكىزىلەدى. سونداي-اق بالالار ەكولوگيانى، ۆەتەريناريا جانە زووتەحنيكا نەگىزدەرىن، گەرپەتولوگيانى، ورنيتولوگيانى جانە بيولوگيانىڭ باسقا دا باعىتتارىن زەرتتەيدى. ۇيىمداستىرۋشىلار بۇل ءبىلىم بالالارعا بولاشاق ماماندىعىن انىقتاۋعا كومەكتەسەتىنىنە سەنىمدى.
«كۋرس بىتكەن سوڭ ءاربىر بالا جاس ناتۋراليست اتانىپ، سەرتيفيكات الادى. قىركۇيەك ايىندا الماتى حايۋاناتتار باعىندا قىسقى زوومەكتەپكە قابىلداۋ باستالادى. بۇل تۋرالى اقپارات الماتى مادەنيەت باسقارماسى مەن حايۋاناتتار باعىنىڭ @almatymadeniet جانە @almatyzoo رەسمي Instagram پاراقشالارىندا جاريالانادى»، - دەپ ءسوزىن تۇيىندەدى زوومەكتەپتەگى قازاق توبىنىڭ جەتەكشىسى جانسايا احمەتكارىموۆا.
