«قولجەتىمدى ينتەرنەت» ۇلتتىق جوباسى ازىرلەنىپ جاتىر
اقتوبەدە باستالعان «ءبىلىم ALL» جوباسى اۋىل مەن قالا بالاسىنىڭ ءبىلىمىن تەڭەستىرۋگە مۇمكىندىك بەرەدى. ول ءۇشىن بارلىق ەلدى مەكەندى ينتەرنەتپەن قامتۋ قاجەت، دەپ حابارلايدى Almaty-akshamy.kz قازاقپاراتقا سىلتەمە جاساپ.
اقتوبەگە جۇمىس ساپارىمەن كەلگەن سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين «ءبىلىم ALL» جوباسىمەن تانىستى. قوبدا اۋدانى تالدىساي اۋىلىنا بارىپ، مۇعالىمدەرمەن، وقۋشىلارمەن كەزدەستى.
«اقتوبە وبلىسىنىڭ اۋىلدارىندا 200-گە جۋىق مەكتەپ بار. ونىڭ 120-سىندا «ءبىلىم ALL» جوباسى قولعا الىندى. جوبانىڭ دامۋىنا ينتەرنەت قاجەت. ينتەرنەتسىز قاتىناس، بەينەساباق تا بولمايدى. سوندىقتان، ينتەرنەت ماسەلەسىن شەشۋ ءۇشىن بارلىق ءموبيلدى وپەراتورمەن بىرگە كەلدىك. اكىمنىڭ وسىنداي جوبا ۇيىمداستىرىپ جاتقانى پرەزيدەنتتىڭ اۋىلدى كوتەرۋ تۋرالى تاپسىرماسىنا كىرەدى. پيلوتتىق جوبا وسى جەردەن باستالدى. سەبەبى، قالاعا قاراعاندا اۋىل بالالارىنىڭ ءبىلىم دەڭگەيى تومەن، 15% ايىرماشىلىعى بار. ال، ««ءبىلىم ALL» جوباسى جوعارى بىلىكتى مامانداردى جيناپ، وقۋشىلارعا ونلاين ساباق بەرۋگە، ولاردىڭ بىلىكتىلىگىن ارتتىرۋعا مۇمكىندىك بەرەدى. بالالارعا عانا ەمەس، اۋىل مۇعالىمدەرىنە دە كەرەك. ولار تاجىريبەسىن ارتتىرادى»، - دەدى مينيستر باعدات مۋسين.
جالپى، اقتوبە وبلىسىندا اۋىلدارداعى 120 مەكتەپتىڭ ينتەرنەت ساپاسى وسى جوباعا ساي كەلەدى دەپ ەسەپتەلگەن. بيىل قىركۇيەككە دەيىن تاعى جيىرماسىن ينتەرنەتكە قوسۋ جوسپاردا بار. ال وزگەسى 2024 جىلدىڭ قىركۇيەگىنە دەيىن قامتىلادى.
«بۇرىن «ينتەرنەت كەرەك» دەگەن كەزدە وينايدى، ۆيدەو قارايدى دەپ ايتىلدى. ال ەندى وقۋعا تالپىنعان بالالارعا كەرەك دەگەن كەزدە باسقاشا سۇراق تۋىندايدى. سوندىقتان، ءبىز وسى جوباعا رەسپۋبليكالىق دەڭگەيدەن قاراجات بولە الامىز. ءقازىر «قولجەتىمدى ينتەرنەت» ۇلتتىق جوباسى ازىرلەنىپ جاتىر. ونى ناۋرىز ايىنىڭ باسىندا بەكىتەمىز. كەيىن قاراجات بولىنەدى. قاراجاتتى مەكتەپتەردى ينتەرنەتكە قوسۋعا جۇمسايمىز. ءاربىر اۋىلعا سىم تارتۋ، قۇبىر تارتۋ سياقتى جۇمىس. اۋىلعا ينتەرنەت جەتكىزۋ ءۇشىن بەس جىلدا 190 ملرد تەڭگە جۇمسالادى. كوبىنە وپتيكالىق، قيىن جەرگە ستۋپنيكتىك جەلى قوسىلادى»، - دەدى مينيستر.
ەسكە سالساق، سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين اقتوبەدە تانىستىرىلعان «فەلدشەر سومكەسى» جوباسىنا قولداۋ كورسەتۋگە ۋادە ەتتى.