قالا ماڭىنداعى قويمادان ءورت شىقتى

الماتى وبلىسى توتەنشە جاعدايلار دەپارتامەنتىنىڭ مالىمەتىنشە، بۇگىن تاڭعى ساعات 7 شاماسىندا كەزەكشى بولىمگە ىلە اۋدانىنىڭ پەرۆوماي ونەركاسىپ ايماعىندا مەتالل كونسترۋكسيالارىنان جاسالعان، اۋماعى 3600 شارشى مەتر بولاتىن پوليەتيلەن تاۋارلارى ساقتالعان قويمادان ءورت شىققانى تۋرالى حابار تۇسكەن، دەپ حابارلايدى اlmaty-akshamy.kz.  

«وقيعا ورنىنا دەرەۋ الماتى وبلىسى تجد قىزمەتكەرلەرى جىبەرىلدى. ساعات 7:20–دا العاشقى ءورت ءسوندىرۋ بولىمشەلەرى كەلگەن كەزدە نىسان تولىعىمەن وتقا ورانعان ەدى. سونىمەن قاتار، شاقىرۋدىڭ جوعارى دارەجەسى بويىنشا جاقىن ماڭداعى بولىمشەلەردىڭ كۇش-قۇرالدارى جىبەرىلدى. ءورتتىڭ ۇلكەن اۋماققا تارالۋىنىڭ سەبەبى — ءورت تۋرالى كەش حابارلاۋ. سونداي-اق ەڭ جاقىن ورنالاسقان بورالداي كەنتىنىڭ 9ء-ورت ءسوندىرۋ بولىمىنەن اراقاشىقتىق — 15 كم. وبلىس ورتالىعىنان — 87 كم»، — دەپ اتاپ ءوتتى دەپارتامەنتتەن.

ءورت ساعات 9:12–دە وقشاۋلاندى. جاقىن ماڭداعى قويماعا وتتىڭ تارالۋىنا جول بەرىلمەدى.

ەڭ جاقىن ءورت گيدرانتى 500 مەتر قاشىقتىقتا ورنالاسقان.

ءورتتى ءسوندىرۋ جۇمىستارى جالعاسىپ جاتىر. زارداپ شەككەندەر جوق.

ءورتتىڭ سەبەبىن انىقتاۋ ءۇشىن الماتى وبلىسى تجد انىقتاۋ ءبولىمىنىڭ جانە ءورت زەرتحاناسىنىڭ قىزمەتكەرلەرى جۇمىس ىستەپ جاتىر.

ءورتتى سوندىرۋگە الماتى وبلىسى تجد 37 قىزمەتكەرى مەن 14 تەحنيكاسى جانە الماتى قالاسىنان 22 مامان مەن 4 ءورت ءسوندىرۋ ماشيناسى جۇمىلدىرىلدى.