الماتىدا قالا كۇنى قارساڭىنداعى تازالىق اپتالىعى اياسىندا اۋقىمدى تازالىق جۇمىستارى جۇرگىزىلدى، دەپ حابارلايدى aqshamnews.kz
قىركۇيەكتىڭ ءۇشىنشى جەكسەنبىسىندە اتاپ وتىلەتىن قالا كۇنى قارساڭىندا، 9 قىركۇيەكتە تازالىق اپتالىعى باستالدى. جالپى رەسپۋبليكالىق «تازا قازاقستان» باعدارلاماسى اياسىندا قوعامدىق ورىنداردا، كوشەلەردەگى قوقىس جاشىكتەرى مەن ارىق جۇيەلەرىندە اۋقىمدى تازالىق جۇمىستارى ۇيىمداستىرىلدى. ماقسات – مەگاپوليستى تازا، جايلى ءارى تارتىمدى ەتۋ.
نەبارى بەس كۇن ىشىندە ارنايى تەحنيكانىڭ كومەگىمەن كوشە-جول جەلىسىنەن 1000 م³-تان استام قوقىس شىعارىلدى، ونىڭ ىشىندە ارىق جەلىلەرىنەن 365،2 م³ قوقىس جينالدى.
سانيتارلىق تازالىق جالپى اۋدانى 25،1 ملن م² جانە ۇزىندىعى 2 777 كم بولاتىن 2 318 كوشەنى قامتىدى. كوشە-جول جەلىسىن تازالاۋ جۇمىستارى 12 مەردىگەر ۇيىمنىڭ كۇشىمەن جۇزەگە اسىرىلۋدا. بۇگىنگى كۇنى قالادا 1000-نان استام ارنايى تەحنيكا مەن 1300-گە جۋىق جۇمىسشى جۇمىلدىرىلعان. كۇندىزگى ۋاقىتتا كوشەلەردى تازالاۋعا كۇن سايىن 700 تەحنيكا جانە شامامەن 1000 جۇمىسشى شىعادى. تۇنگى اۋىسىمدا شامامەن 220 تەحنيكا جانە 250 جۇمىسشى جۇمىس ىستەيدى.
ۇزىندىعى 1525 كم قالانىڭ ارىق جەلىسىن تازارتۋعا ەرەكشە نازار اۋدارىلادى. كۇن سايىن ارىق جەلىسىنەن شامامەن 160 م³ لاي مەن قوقىس شىعارىلادى. شىعارىلاتىن قالدىقتاردىڭ باسىم بولىگى پلاستيكتەن تۇرادى. ەرىگەن جانە نوسەر سۋىنىڭ كەدەرگىسىز اعىپ كەتۋى ءۇشىن ارىق جەلىلەرىن تازالاۋعا كۇن سايىن 80 بىرلىك تەحنيكا مەن 320 جۇمىسشى جۇمىلدىرىلادى.
قالا بويىنشا تاۋلىگىنە ورتا ەسەپپەن 520 م³ قوقىس پەن قالدىق شىعارىلادى، ونىڭ ىشىندە 100 م³-كە جۋىعى پلاستيك. ماگيسترالدىق كوشەلەر كۇنىنە ەكى رەت، ال اۋداندىق ماڭىزى بار كوشەلەر كۇندەلىكتى تازارتىلادى. اۆتوبۋس ايالدامالارى، قوقىس جاشىكتەرى مەن ورىندىقتار جۋىلىپ جاتىر. سونداي-اق، جول بويى مەن قوعامدىق ورىنداردا جەرگە تۇسكەن جاپىراقتار جينالىپ، شىعارىلادى.
دەگەنمەن، قالاداعى تازالىقتى ساقتاۋ شارالارىنا قاراماستان، لاستانۋعا بايلانىستى ماسەلەلەر تۋىنداپ وتىر. ارىقتار ءالى دە تۇرعىندار تاستايتىن كەزدەيسوق قوقىستارمەن بىتەلىپ، قاتتى جاۋىن-شاشىن كەزىندە سۋ باسۋعا اكەلەدى. تازالىقتى ساقتاۋ – ازاماتتىق جاۋاپكەرشىلىكتىڭ بەلگىسى. قالامىزدىڭ تۇرعىندارى مەن قوناقتارىن قوقىس تاستاماۋعا، اسىرەسە ارىقتارعا قوقىس لاقتىرماۋعا جانە تازالىقتى ساقتاۋعا شاقىرامىز.
ەسكە سالا كەتسەك، بيىل الماتىدا قالا كۇنى بالالار مەن ەرەسەكتەرگە ارنالعان 150-دەن استام ءتۇرلى فورماتتاعى ىس-شارالارمەن اتاپ وتىلەدى.