ساۋدا ورنى اشىق الاڭدا ورنالاسقان.
بۇگىن الماتىدا قالا كۇنىنە وراي جاڭارتىلعان «سارىارقا» بازارىنىڭ اشىلۋ ءراسىمى ءوتتى. ماڭىزدى امبەباپ نىسان 437 دۇكەنگە شاقتالىپ قايتا جاساقتالىپ وتىر. سونداي-اق، مەگاپوليستىڭ بارلىق اۋدانىندا سانيتارلىق تالاپتارعا ساي مەرەكەلىك جارمەڭكەلەر ۇيىمداستىرىلۋدا، دەپ حابارلايدى Almaty-akshamy.kz Almaty.tv-گە سىلتەمە جاساپ.
قالا كۇنىن اتاپ ءوتۋ اياسىندا اۋەزوۆ اۋدانىندا جاڭارتىلعان «سارىارقا» بازارىنىڭ سالتاناتتى اشىلۋ ءراسىمى ءوتتى. بۇعان دەيىن اشىق الاڭدا ورنالاسقان ساۋدا ورنىنىڭ بۇگىنگى كەيىپىنە جەرگىلىكتى حالىق ءدان ريزا. مودەرنيزاسيالانعان امبەباپ بازار الداعى ۋاقىتتا تاعى كەڭەيتىلىپ، 400-دەن اسا ساۋدا دۇكەنى ەسىگىن ايقارا اشپاق. جالپى اۋماعى 1500 شارشى مەترگە جەتەتىن نىساننىڭ قۇرىلىسى تولىق 2024ء-ىنشى جىلعا دەيىن اياقتالادى دەپ جوسپارلانۋدا.
«ەكى جىل بۇرىن وسى جەردە ساۋدا دۇكەندەرى مەن كونتەينەرلەر بولعان ەدى. قىستا جىلۋى جوق. ال، جازدا سانيتارلىق تالاپتارعا ساي كەلمەيتىن ورىن بولاتىن. قازىرگى تاڭدا «سارىارقا» بازارىنىڭ ءبىرىنشى كەزەڭى اياقتالىپ، جاقسى ورىندار جاسالدى. ادامدار كەلىپ دەمالسا دا، تاماقتانسا دا، ساۋدا جاساسا دا ىڭعايلى»، - دەدى اۋەزوۆ اۋدانىنىڭ اكىمى سايران سايفەدەنوۆ.
اۋەزوۆ اۋدانىنداعى مەرەكەلىك شارا ناتاليا ساس اتىنداعى بالالار مەن جاسوسپىرىمدەر تەاترىنىڭ الدىندا جالعاسىن تاپتى. مۇندا ءداستۇرلى اۋىلشارۋاشىلىعى جارمەڭكەسى ۇيىمداستىرىلىپ، الماتىنى الەمگە ايگىلى ەتكەن «اپورت» المالارى تۇرعىندارعا ۇسىنىلدى. جەرگىلىكتى حالىق مۇنداي شارالاردىڭ ءوتۋى شاھاردىڭ دامۋىنا مول ۇلەس قوسادى، دەيدى.
«ءقازىر مەن ءتۇس كورگەندەي بولىپ تۇرمىن. كەشە عانا تاپ-تازا جەر بۇگىن جايناپ كەتىپتى. بارلىعى ورىن-ورنىمەنەن، حالىقتى ويلاعاندارى ءۇشىن راقمەت! ءبارى تومەن باعامەن ساتىلىپ جاتىر»، - دەدى اۋەزوۆ اۋدانىنىڭ تۇرعىنى سارسەبالا كوپەبايەۆا.
ءدال وسىنداي جارمەڭكە مەگاپوليستىڭ بارلىق اۋداندارىندا ۇيىمداستارىلدى. الماتىنىڭ سيمۆولىنا اينالعان المالاردىڭ ءتۇرلى سورتتى جەتىسۋ مەن ناۋرىزباي، بوستاندىق اۋدانىنداعى جارمەڭكەلەرىندە دە قويىلدى. قالا كۇنىنىڭ وسىلاي ەرەكشە وتۋىنە اتسالىسقان ساۋداگەرلەر ەت پەن ءسۇت ونىمدەرىن دە ارزان باعامەن ساتىپ، كەلۋشىلەردى قۋانتتى.
«بۇل - قازاقستاندىق، ەرەكشە سورتتى المالار. ءبىز ولاردى ارنايى شارۋا قوجالىعىندا ءوسىرىپ، جان-جاقتا ساتامىز. مىنە «اپورت»، «ازەرگولد»، «سيناپ»، «سۇلۋ بيكەش»، مىنا جەردە «ليمونكا» جانە «امەريكانكا» بار. المانىڭ ءبارى وتە ءدامدى»، - دەدى ساۋداگەر ميراس قۋاندىق.
كوزدىڭ جاۋىن الاتىن زەرگەرلىك زاتتار مەن ۇلتتىق ناقىشتاعى باس كيىمدەر. بۇل المالى اۋدانىنداعى جارمەڭكە سورەلەرى. جەرگىلىكتى شەبەرلەر بيىل دا وزدەرى قولدان جاساعان بۇيىمدارىمەن الماتىلىقتاردى ءتانتى ەتۋدە.
المالى اۋدانىندا اۋقىمدى تۇردە ۇيىمداستىرىلعان جارمەڭكەنىڭ ەڭ باستى ەرەكشەلىگى - مۇندا مۋزىكالىق اسپاپتار دا ساتىلىمعا قويىلىپتى. ماسەلەن ءبىز ويناعان مىنا قۇرال «گليۋكوفان» دەپ اتالادى ەكەن. شەبەردىڭ ايتۋىنشا، زاماناۋي ۇلگىدەگى اسپاپ ەڭ العاش 2007 جىلى دومينيكانادا ويلاپ تابىلعان. ءقازىر ساننەن قالماعان ءبىزدىڭ وتاندىق شەبەرلەر مۇنى الماتىدا ءوندىرىپ، ساتىپ وتىر. سونىڭ ىشىندە، قازاقتىڭ ۇلتتىق اسپابى - شاڭقوبىزدى سورەلەردەن تابۋعا بولادى.
جالپى بيىل قالا بويىنشا ۇيىمداستىرىلعان شارادا 100 توننا الما مەن 40 توننا كوكونىس جانە وزگە دە ازىق-تۇلىك تاۋارلارى ۇسىنىلعان. مەرەكەلىك جارمەڭكەلەر دەمالىس كۇندەرى 26 قىركۇيەككە دەيىن جالعاسپاق.