اقسۋ اۋدانىندا بارلىق تۇرعىن ۆاكسينا سالدىردى.
الماتى وبلىسىنىڭ اقسۋ اۋدانىندا تۇرعىنداردىڭ بارلىعى ۆاكسينا سالدىردى، دەپ حابارلايدى Almaty-akshamy.kz «حابار 24»-كە سىلتەمە جاساپ.
ناتيجەسىندە ىندەت تاراۋ كورسەتكىشى تومەندەپ، جەرگىلىكتى حالىق قالىپتى ومىرگە ورالا باستادى.
«بىلتىر جەتىنشى ايلاردا قاتتى بولدى عوي. تۋعان-تۋىستاردىڭ ولگەن قازاسىنا بارا الماي، بالالار دا اركىم ءوز ۇيىندە وتىرىپ، قورقىنىش بولدى. ۆاكسينا العاننان كەيىن قورقىنىش سەيىلىپ، ءبارىمىز باراتىن جەرىمىزگە بارىپ، اقىرىن-اقىرىن قوناققا بارىپ، كىسى شاقىرىپ، ءسويتىپ جاتىرمىز. ەشقانداي قورقىنىش جوق»، - دەيدى سۋىقساي اۋىلىنىڭ تۇرعىنى نۇرعايشا مادەن قىزى.
اقسۋ اۋدانىندا سۋىقساي سياقتى 17 اۋىلدىق وكرۋگ بار. ولاردىڭ ءارقايسىندا ستاسيونارلى ەكپە سالۋ پۋنكتتەرى جۇمىس ىستەيدى. سونىمەن قاتار شالعاي اۋىلدار ءۇشىن 2 جىلجىمالى كەشەن قىزمەت كورسەتىپ جاتىر
«ەگەر بۇرىندا كۇنىنە 45-50 ادام كەلسە، بۇگىنگى كۇنى ءبىرىنشى تۋرعا 10-15 ادام كەلەدى. ويتكەنى كوبىسى ءبىرىنشى تۋردى قويىپ تاستاعان. ءقازىر ەكىنشى تۋرعا ناپلىۆ بولىپ جاتىر. اۋدانداعى 38 مىڭنان اسا ادامنىڭ 20 مىڭنان استامى ەكپە سالدىرۋعا جارامدى دەپ تانىلعان. بۇگىنگى كۇنى بارلىعى دا ۆاكسينا الدى. ناتيجەسىندە ايماقتا ەپيدەميولوگيالىق جاعداي تۇراقتالا تۇسكەن»، - دەدى دارىگەر گۇلجان قۋات قىزى.
اۋدان اكىمى ورىنباسارىنىڭ ايتۋىنشا، ءقازىر ۆيرۋستىق ءوسىم ازايعان.
«بىزدە ءوسىم جوق. ءقازىر ەكى جەتىلىكتى الساق، بىزدە ون ءبىر جاعداي عانا. بىلاي ايتقاندا، ءبىز «جاسىل ايماقتا» دەسەك بولادى. وسى ناتيجەسى. بۇل وسى ۆاكسيناسيانىڭ ناتيجەسى دەپ ويلايمىز. الماتى وبلىسىندا بۇگىنگى كۇنگە دەيىن 725 مىڭ ادام ۆاكسينا العان. بۇل ەكپە الۋعا بولاتىن ازاماتتاردىڭ 66%ء-ى. جالپى وڭىردە 1 ملن ءبىر ءجۇز مىڭنان اسا تۇرعىننىڭ يممۋنيتەتىن جاساندى جولمەن كۇشەيتۋ كوزدەلگەن»، - دەيدى اقسۋ اۋدانى اكىمىنىڭ ورىنباسارى عازيز ەسجانوۆ.