الماتىداعى سايران كولىنىڭ جاعاسىندا ءوتىپ جاتقان تازالىق اكسياسىنا تانىمال ونەر يەلەرى مەن قوعام قايراتكەرلەرى قاتىسىپ جاتىر. ولاردىڭ قاتارىندا ق ر ەڭبەك سىڭىرگەن قايراتكەرى، حالىقتىڭ سۇيىكتى ءانشىسى جۇبانىش جەكسەن ۇلى دا بار. ول تابيعاتتى ايالاۋ - ءاربىر ازاماتتىڭ پارىزى ەكەنىن ايتىپ، كوپشىلىكتى قورشاعان ورتاعا ۇقىپپەن قاراۋعا شاقىردى، دەپ حابارلايدى، Aqshamnews.kz ءتىلشىسى.
"قالا جالعىز، ءبىز كوپپىز. ەگەر ءار ادام وزىنەن باستاپ تازالىققا ءمان بەرسە، مۇنداي سەنبىلىكتەرگە ءجيى قاتىسسا، الماتى ودان ءارى اجارلانا تۇسەر ەدى. تابيعات - بىزگە بەرىلگەن امانات. سايران سياقتى كورىكتى جەرلەردى تازا ۇستاۋ — بولاشاق ۇرپاق الدىنداعى جاۋاپكەرشىلىك. قولىمىزدا بار التىندى باعالاي بىلەيىك"، – دەدى ءانشى.
ونىڭ ايتۋىنشا، تازا ورتادا عانا شىعارماشىلىق تا، رۋحانيات تا داميدى. "مادەنيەتتى ادام - ەڭ الدىمەن تابيعاتتى لاستامايتىن ادام" دەگەن جۇبانىش جەكسەن ۇلى بۇل باستاماعا بارشا الماتىلىقتاردى بەلسەنە شاقىردى.