الماتىنى قوعامدىق كولىكپەن قامتاماسىز ەتىپ وتىرعان كومپانيالاردىڭ ءبىرى – «الماتىەلەكتروترانس» جشس-ى اۆتوبۋستاردىڭ تەحنيكالىق قىزمەت كورسەتۋىنە بايلانىستى جاڭا پيلوتتىق جوبانى ىسكە اسىرۋدا.
«الماتىەلەكتروترانس» اۆتوبۋستارىنا زاۋىتتىڭ ماماندارى تەحنيكالىق جانە سەرۆيستىك قىزمەت كورسەتەدى. ءوندىرۋشى زاۋىت پەن الماتىلىق كومپانيا اراسىندا اۋتسورسينگتىك قىزمەتكە كەلىسىم جاسالدى. «الماتىەلەكتروترانس» مالىمەتىنشە، پيلوتتىق جوبانىڭ قولعا الىنۋىنا كەلەسى سەبەپتەر نەگىز بولعان:
– مەملەكەتتىك ساتىپ الۋ جۇيەسى باعاسى ەڭ تومەن قىزمەتتى نە جابدىقتى قابىلدايدى. بۇل ءوز كەزەگىندە اۆتوبۋسقا الىنعان جابدىقتاردىڭ ساپالى بولۋىنا كەپىل بەرمەيدى. سوندىقتان قوعامدىق كولىكتەر تەزىرەك توزىپ، ءجيى جوندەۋ جۇمىستارى ىستەلەدى.
– تەندەر وتكىزۋ كوپ ۋاقىت الادى. سوندىقتان جوندەۋ جۇمىستارى تەز ىستەلە قويمايدى، ول ءوز كەزەگىندە قالالىق باعىتتارداعى اۆتوبۋستاردىڭ جيىلىگىن ازايتادى.
– تەندەر ارقىلى قاجەتتى جابدىقتار الىنىپ، كومپانيا ءوز كۇشىمەن جوندەۋ جۇمىستارىن ىستەگەن كەزدە بۇل جۇمىستارعا كەپىلدىك بەرىلمەيدى.
«الماتىەلەكتروترانس» ج ش س باس ديرەكتورىنىڭ تەحنيكالىق سۇراقتار بويىنشا ورىنباسارى ايدار ەشپانوۆتىڭ ايتۋىنشا، اۋتسورسينگ ارقىلى تەحنيكالىق قىزمەت كورسەتۋ – جوعارى بىلىكتى ماماندارعا جانە زاماناۋي ادىستەرگە قول جەتكىزۋگە مۇمكىندىك بەرەدى، سونداي-اق ساپالى قوسالقى بولشەكتەردىڭ الىنۋىن قامتاماسىز ەتەدى. وعان قوسا، اۋتسورسينگ ارقىلى ىستەلگەن جۇمىستارعا كەپىل بەرىلەدى.