كەزدەسۋ بارىسىندا بىرلەسكەن ىنتىماقتاستىق مۇمكىندىگىن تالقىلادى.
الماتى اكىمى ەربولات دوسايەۆ ەۋروپا قايتا قۇرۋ جانە دامۋ بانكىنىڭ (ەققدب) ۆيسە-پرەزيدەنتى الان پيۋمەن قالانىڭ ينفراقۇرىلىمىن جاقسارتۋ جونىندەگى جوبالاردى جانە شاعىن جانە ورتا بيزنەستى دامىتۋ جونىندەگى باستامالاردى تالقىلادى، دەپ حابارلايدى Almaty-akshamy.kz.
الماتى اكىمدىگى مەن ەققدب سوڭعى 13 جىل ىشىندە تۇرعىن ۇي-كوممۋنالدىق شارۋاشىلىقتى، ينفراقۇرىلىمدى مودەرنيزاسيالاۋعا جانە كولىك سەكتورىن دامىتۋعا باعىتتالعان باستامالاردى ىلگەرىلەتۋ اياسىندا جەمىستى ىنتىماقتاسۋدا.
كەزدەسۋ بارىسىندا تروللەيبۋس پاركىن جاڭارتۋ پەرسپەكتيۆاسى جانە تارتقىش قوسالقى ستانسيالاردى (190 تروللەيبۋس، 10 قوسالقى ستانسيا) مودەرنيزاسيالاۋ ماسەلەلەرىنە ەرەكشە نازار اۋدارىلدى.
تاراپتار سونداي-اق جەڭىل رەلستى كولىك (جرك) قۇرىلىسى بويىنشا بىرلەسكەن ىنتىماقتاستىق مۇمكىندىگىن تالقىلادى. ەۋروپالىق قايتا قۇرۋ جانە دامۋ بانكى بۇرىن (2015-2018 جج.) الماتى قالاسىندا جرك جۇيەسىن سالۋ جانە پايدالانۋ جوباسىن ىسكە اسىرۋدىڭ جايلىلىعى (ەكولوگيالىق، ەكونوميكالىق جانە الەۋمەتتىك تالداۋدى قوسا العاندا) بويىنشا زەرتتەۋلەر جۇرگىزگەن بولاتىن.
كەزدەسۋ بارىسىندا قالاداعى ەكولوگيالىق احۋال ماسەلەلەرى تالقىلاندى. اعىمداعى جىلدىڭ اقپان ايىنداعى الدىن الا دەرەكتەر بويىنشا اۋادا ازوت ديوكسيدى (NO2) نورماسىنىڭ 6 ەسە، كۇكىرت ديوكسيدى (SO2) جانە ازوت وكسيدى (N2O) نورماسىنىڭ 5 ەسە ارتۋى تىركەلگەن. لاستانۋدىڭ نەگىزگى كوزدەرىنىڭ ءبىرى ونەركاسىپتىك كاسىپورىندار بولىپ تابىلادى (37%). ساراپتامالىق قورىتىندىعا سايكەس، جەو-2 مودەرنيزاسيالاۋ قاجەت. ەقدب جوبانىڭ كرەديتورلارىنىڭ ءبىرى رەتىندە اكىمدىك تاراپىنان قولداۋ سۇرادى، ول كومەك كورسەتۋگە دايىن ەكەنىن راستادى. جوبانى تابىستى ىسكە اسىرۋ ءۇشىن بىرلەسكەن جول كارتاسى ازىرلەنەلى جانە قابىلداناتىن بولادى.
كەزدەسۋ بارىسىندا الماتىدا ەنەرگيا تيىمدىلىگى جانە ەنەرگيا ۇنەمدەۋ بويىنشا ESG-جوبالارىن ىسكە اسىرۋ، سۋ، جىلۋ شىعىندارىن ازايتۋ ءۇشىن ينجەنەرلىك ينفراقۇرىلىمدى مودەرنيزاسيالاۋ جانە ت.ب. ماسەلەلەر تالقىلاندى.
قالانى دامىتۋدىڭ ماڭىزدى باعىتى ونى سيفرلاندىرۋ بولىپ تابىلادى. تاراپتار قالانىڭ ينفراقۇرىلىمى مەن پروسەستەرىنىڭ جوعارى دالدىكتەگى سيفرلىق كوشىرمەسى بولىپ تابىلاتىن "سيفرلىق كوشىرمە" جوباسىن ىسكە اسىرۋ بويىنشا ۇسىنىستى قارادى. جۇيە كليماتتىڭ وزگەرۋى، قوعامدىق كولىك، حالىقتىڭ ءوسۋى جانە ت. ب. ماسەلەلەردى قوسا العاندا، ءتۇرلى جاعدايلاردا نفراقۇرىلىمدى دەرەۋ-تەستىلەۋ دەرەكتەرىن وڭدەۋگە ارنالعان پلاتفورما بولىپ تابىلادى.
شاعىن جانە ورتا بيزنەستى قولداۋ جانە دامىتۋ ماقساتىندا بىرلەسكەن باعدارلامالار مەن باستامالار تالقىلاندى. ايتا كەتەرلىگى، كاسىپكەرلىك سالاسى قالا ءۇشىن زور ماڭىزعا يە – بۇل سەكتوردا 10 الماتىلىقتىڭ 6-ى جۇمىس ىستەيدى.
كەزدەسۋ سوڭىندا تاراپتار ۇسىنىلعان جوبالاردى ءبىر اي مەرزىمدە زەردەلەۋگە جانە ودان ءارى ىنتىماقتاستىق ماقساتىندا تالقىلاۋلارعا قايتا ورالۋعا كەلىستى.