الماتىدا سەل ءقاۋپى جاعدايى ەرەكشە باقىلاۋدا
الماتى اكىمى ەربولات دوسايەۆ قالا تجد باسشىلىعىمەن جانە «قازسەلدەنقورعاۋ» مم اقساي وزەنىنىڭ باسسەينىنەن كىشى الماتى وزەنىنىڭ باسسەينىنە دەيىن ىلە الاتاۋ جوتاسىنداعى بيىك تاۋلى مورەندى كولدەر مەن مۇزدىقتاردىڭ، سەل كەسىندىلەرى مەن وشاقتاردىڭ جاعدايىن تىكۇشاقپەن تەكسەرىپ شىقتى. سونىمەن قاتار، سەلدەن قورعاۋ نىساندارى دا قارالدى، دەپ حابارلايدى Almaty-akshamy.kz.
الماتىنىڭ تاۋ بوكتەرىندە بارلىعى 51 مورەندى كول بار، ونىڭ التاۋى – ەڭ سەرپىندى. بۇل كىشى الماتى وزەنى باسسەينىندەگى №6 كول؛ ۇلكەن الماتى باسسەينىندەگى № 10، 13-بيس كولدەرى جانە اقساي وزەنى باسسينىندەگى № 8، 9، 10 كولدەرى.
قازىرگى ۋاقىتتا الماتى قالاسىنداعى سەل ءقاۋپى تۇراقتى جانە ەرەكشە باقىلاۋدا. كولدەردىڭ كوپ بولىگى 65-70% - عا تولادى - سۋ دەڭگەيى ءقاۋىپسىز بەلگىلەردە.
قازىرگى كەزدە تاۋلاردا اۋا تەمپەراتۋراسى 5-6°س قۇرايدى. شىلدەدە بيىك تاۋلى ايماقتاعى ورتاشا ايلىق تەمپەراتۋرا 7-15°س شەگىندە اۋىتقيدى. «قازگيدرومەت» رمك ۇزاق مەرزىمدى بولجامى بويىنشا جازعى كەزەڭدە تاۋلاردا اۋا تەمپەراتۋراسىنىڭ جوعارىلاۋى كۇتىلەدى، كەيدە نورمادان جوعارى (22°س دەيىن). سەل شىعارىندىلارىنىڭ الدىن الۋ ءۇشىن بيىل مورەندى كولدەردىڭ سۋى اعىزىلادى. الماتىنىڭ جەرگىلىكتى بيۋدجەت رەزەرۆىنەن وسى ماقساتتارعا 36،3 ملن تەڭگە ءبولىندى. بۇل قاراجاتقا سۋ اعىزۋ ارنالارىن تازارتۋ جانە تەرەڭدەتۋ ءۇشىن ونىمدىلىگى جوعارى سورعىلار، سيفون قۇبىرلارى، دانەكەرلەۋ اپپاراتتارى جانە باسقا دا جابدىقتار ساتىپ الىنادى.
الماتى اكىمى ەربولات دوسايەۆ تاۋ وزەندەرىندەگى گيدرومەتەورولوگيالىق، كوشكىن، سۋ تاسقىنى، سەل جاعدايىنا تۇراقتى باقىلاۋ جۇرگىزۋدى جانە كۇشەيتۋدى تاپسىردى.
«قازسەلدەنقورعاۋ» مم ماماندارى 10 تۇراقتى جانە 3 ماۋسىمدىق پوستاردا باقىلاۋ جۇرگىزەدى. 20 ماۋسىمنان كەيىن قالعان 10 ماۋسىمدىق پوستتا باقىلاۋ باستالادى.