مەككە مەن مەدينا قالاسىنا جولداما العان 50-گە جۋىق ازامات الاياقتارعا الدانىپ، سان سوعىپ قالدى.
ولاردىڭ دەنى - شىمكەنت جانە الماتى قالاسىنىڭ تۇرعىندارى، دەپ حابارلايدى Almaty-akshamy.kz Polisia.kz-كە سىلتەمە جاساپ.
26 قاڭتاردا ەڭبەكشى اپب-عا الاياقتىق جايتى بويىنشا ەرلى-زايىپتىلار ارىزدانعان. كۇيەۋى مەن ايەلى قاسيەتتى مەكەن ساۋد ارابياسىنا بارۋعا «كاۋسار-تراۆەل» تۋريستىك اگەنتتىگى جولداما ۋادە ەتكەنىن جەتكىزدى. ولار ءوز قىزمەتىن 1 ملن تەڭگەگە باعالاعان. الايدا، 13 قاڭتاردا شەتەلگە ۇشۋ كەرەك بولعان ەرلى-زايىپتىلار ۋادە ەتىلگەن اۋە بيلەتتەرى مەن ەلدەن شىعۋ ۆيزاسىن الا الماعان. كومپانيا ديرەكتورى قوڭىراۋلارعا جاۋاپ بەرمەي، جۇمىس ورنىنا ىزدەپ بارعاندا، ول جەردە بولماي شىققان. وسىنداي ارىزدارمەن پوليسياعا اتالعان تۋراگەنتتىكتىڭ الاياقتىق قۇربانى بولعان تاعى 48 ادام جۇگىندى.
كەلتىرىلگەن جالپى شىعىن كولەمى شامامەن 33 ميلليون تەڭگەنى قۇرادى. پوليسيا باسقارماسىندا ق ر قك-نىڭ 190-بابى (الاياقتىق) بويىنشا سوتقا دەيىنگى تەرگەۋ باستالدى جانە ءتارتىپ ساقشىلارى بەلگىسىز باعىتتا جاسىرىنعان كومپانيا ديرەكتورىن ىزدەستىرۋگە كىرىستى. ونى ىزدەۋگە بەس كۇن قاجەت بولدى. جەدەل ءىس-شارالاردى وتكىزۋ بارىسىندا ەڭبەكشى اپب-نىڭ كريمينالدىق پوليسيا قىزمەتكەرلەرى ەر ادامنىڭ الماتىدا جاسىرىنىپ جۇرگەنىن انىقتادى. ول مەدەۋ اپب-نىڭ ارىپتەستەرىمەن بىرگە جالدامالى پاتەرلەردىڭ بىرىندە ۇستالدى. قازىرگى تاڭدا كۇدىكتى سوت شەشىمىمەن قاماۋعا الىندى. سوتقا دەيىنگى تەرگەۋ امالدارى جۇرگىزىلىپ جاتىر. پوليسيا زارداپ شەككەندەردىڭ سانى ارتۋى مۇمكىن ەكەنىن جوققا شىعارمايدى.