ىستەن شىققان نەمەسە كەرەكسىز زاتتارعا ەكىنشى ءومىر سىيلاۋعا بولادى.
ءبىر قاراعانعا كەرەكسىز، جارامسىز بولىپ كورىنەتىن زاتتار دا ءۇي-تۇرمىستا ۇلكەن پايدا اكەلۋى مۇمكىن. شاشىڭىزعا تۋرا كەلمەيتىن سۋسابىن نەمەسە شومىلۋعا ارنالعان گەل، ءيىسى ۇنامايتىن لوسون، گەل، ءتۇسى سىزگە تۋرا كەلمەيتىن دالاپ – مۇنىڭ ءبارى سورەڭىزدەگى ورىندى تەككە الىپ تۇرادى. تاستاپ جىبەرۋگە دە قيمايسىز. Almaty-akshamy.kz Ernur.kz پورتالى جاريالاعان پايدالى كەڭەستەردى نازارلارىڭىزعا ۇسىنادى:
لوسون، تونيك، ميسەلليارلى سۋ
قۇرالداردىڭ پايداعا اسپاي قالۋىنىڭ بىرنەشە سەبەبى بار: ءيىسى ۇناماي قالادى، تەرىڭىزگە جاقپايدى، ساقتاۋ مەرزىمى بىتۋگە جاقىن. قانداي پايداعا اسىرۋعا بولادى؟ جاقسى انتيسەپتيك: ءسپيرتتى تونيكتەر قولدى، تەلەفوندى، كلاۆياتۋرانى جاقسى تازارتىپ، زالالسىزداندىرادى. كيىمدەگى داقتاردى جاقسى تازارتادى. زاتبەلگى مەن جاپسىرمالاردى كۇش سالماي-اق جىلدام كەتىرەدى. ميسەلليارلى سۋ اشىق ءتۇستى بىلعارىدان تىگىلگەن كيىمدەگى تۇرىپ قالعان داقتى جاقسى كەتىرەدى. اينا مەن شىنى زاتتاردى جالتىراتىپ تازارتۋعا بولادى.
ەگەر قولىڭىزدا اينا تازارتاتىن قۇرال بولماسا، وندا ورنىنا لوسون مەن تونيك كومەكتەسەدى. اينا سۇرتەتىن شۇبەرەككە كىشكەنە عانا قۇيىپ الساڭىز جەتكىلىكتى. سۋسابىن، دۋشقا ارنالعان گەل، شاشقا ارنالعان بالزام كەز كەلگەن سۋسابىن نەمەسە سەبەزگىگە ارنالعان گەل ءۇيدى رەتكە كەلتىرۋدە جاقسى كومەكشى. ەدەندى، جيھازداردى، كافەلدى سۇرتەتىن كەزدە ەكى-ۇش اس قاسىق قوسىپ جىبەرسەڭىز، تەك تازارتىپ، جىلتىراتىپ قانا قويمايدى، سونىمەن بىرگە حوش ءيىس تە بەرەدى.
بالالاردى قۋانتىڭىز
سۋسابىن نەمەسە سەبەزگىگە ارنالعان گەلدەن كەرەمەت كوپىرشىكتەر شىعادى. مۇقيات جۋۋدى قاجەت ەتەتىن كيىمدەردى سۋسابىن نەمەسە سەبەزگىگە ارنالعان گەلمەن جۋاتىن بولساڭىز، ۇنتاقپەن جۋعانداي كوپ ۋاقىت المايدى جانە باستاپقى ءتۇسى وڭىپ كەتپەي جاقسى ساقتالادى. ال شاشقا ارنالعان بالزام، كيىمدەردى جۇمساق ەتىپ تۇرادى. ياعني شايعىش (وپولاسكيۆاتەل) ورنىنا پايدالانا الاسىز.
دالاپ نەمەسە ەرىنگە ارنالعان بالزام
ەرىنگە ارنالعان بالزام بىلعارىدان جاسالعان اياق كيىمنىڭ ارتقى بولىگىن جاقسى جۇمسارتادى، مۇيىزگەك بولۋدان ساقتايدى. سونداي-اق اياق كيىمگە ارنالعان كرەمدى الماستىرادى. اياق كيىمدى جالتىراتىپ، جۇمسارتىپ، ۇساق سىزىقتاردى جاسىرادى. ەگەر بالاڭىزدىڭ باتەڭكەسىنىڭ باۋى ءجيى شەشىلىپ كەتە بەرسە، وندا گيگيەنالىق دالاپ جاقسى كومەكتەسەدى. باۋعا دالاپتى جاعىپ قويساڭىز جەتكىلىكتى. سونىمەن بىرگە سومكەدەگى، جەيدەدەگى جۇگىرتپەلەر ءبىر ورنىندا تىستەلىپ قالسا، گيگيەنالىق دالاپ جاعىپ قويىڭىز. قولىڭىز ءىسىپ كەتىپ ساقيناڭىز شىقپاي قالسا، ەرىنگە ارنالعان بالزام نەمەسە مايلى دالاپتى ساقينا اينالاسىنا جاقساڭىز تەز شىعادى. ءبىر قاراعانعا كەرەكسىز، جارامسىز بولىپ كورىنەتىن زاتتار دا ءۇي-تۇرمىستا ۇلكەن پايدا اكەلۋى مۇمكىن، بۇل ءبىر جاعىنان قاراجاتقا ۇنەم. تەك ول ءۇشىن كىشكەنە وي مەن فانتازيانى ىسكە قوسۋ كەرەك.