قايتقان جەردە دە قايىر بار...

بۇل تۋرالى ۆيسە-پرەمەر تامارا دۇيسەنوۆا مالىمدەدى.

زاڭنامالىق اكتىلەرگە جايىلىمداردى ءتيىمدى پايدالانۋعا قاتىستى وزگەرىستەر ەنگىزىلەدى، دەپ حابارلايدى Almaty-akshamy.kz

بىلتىردان بەرى مەملەكەتكە 8،5 ملن گا استام جەر قايتارىلعان، ونىڭ 2،8 ملن گەكتارى پايدالانۋعا بەرىلدى.

ونىڭ ايتۋىنشا، پايدالانىلماي بوس جاتقان نەمەسە ءبىر كەزدە زاڭسىز بەرىلگەن اۋىل شارۋاشىلىعى جەرلەرىن، ونىڭ ىشىندە جايىلىمداردى قايتارۋ ءۇشىن جۇمىس جۇرگىزىلىپ جاتىر.

"2022 جىلدىڭ باسىنان بەرى 8،5 ملن گەكتاردان استام جەر قايتارىلدى، ونىڭ 2،8 ملن گەكتارى ءقازىردىڭ وزىندە ەلدىڭ يگىلىگىنە بەرىلدى. قايتارىلعان جەردىڭ كوبى حالىققا مال جايۋ ءۇشىن بەرىلىپ جاتىر"، - دەدى دۇيسەنوۆا ءماجىلىستىڭ جالپى وتىرىسىندا.

ۆيسە-پرەمەر زاڭنامالىق اكتىلەرگە جايىلىمداردى پايدالانۋ ماسەلەسى بويىنشا وزگەرىستەر ەنگىزۋ ءۇشىن دەپۋتاتتاردىڭ باستاماسىمەن اۋقىمدى جۇمىس جاسالىپ جاتقانىن اتاپ ءوتتى.

بۇل وزگەرىستەر جايىلىمداردى باسقا جەر تۇرلەرىنە اۋىستىرۋعا تىيىم سالۋ، ولاردى مال جايۋ ءۇشىن رەزەرۆكە قويۋ، جايىلىمدىق جەرلەردى الۋ نورماتيۆتەرىن ۇلعايتۋ جانە باسقا دا نورمالار ارقىلى جايىلىمدىق جەرلەردى ۇتىمدى پايدالانۋعا مۇمكىندىك بەرمەك.