گرانت مولشەرى – 400 اەك (1 476 800 تەڭگە).
8 ساۋىردەن باستاپ بيزنەس-يدەيالاردى جۇزەگە اسىرۋ ءۇشىن گرانت الۋعا ءوتىنىم قابىلداۋ باستالادى، دەپ حابارلايدى Almaty-akshamy.kz
وتىنىمدەر Business.enbek.kz پورتالىندا قابىلدانادى.
رەسپۋبليكا بويىنشا ءبىرىنشى لەكتە 4 500 ادامعا گرانت بەرۋ جوسپارلانىپ وتىر.
گرانتتار قايتارىمسىز نەگىزدە بەرىلەدى، اقشا جاڭا بيزنەستى باستاۋعا جانە دامىتۋعا جۇمسالۋعا ءتيىس.
گرانت مولشەرى 400 اەك-تى (1 476 800 تەڭگە) قۇرايدى. ءار قاتىسۋشى ونى ءبىر-اق رەت قانا الا الادى.
جاڭا بيزنەس-يدەيانى ىسكە اسىرۋ ءۇشىن گرانت الۋعا تىركەلگەن جۇمىسسىزدار مەن جەكە كاسىپكەرلەر (تىركەۋ مەرزىمى 3 جىلعا دەيىن) ۇمىتكەر بولا الادى.
بۇل رەتتە ۇمىتكەر مىنا الەۋمەتتىك ساناتتاردىڭ بىرىنەن بولۋى كەرەك:
مۇگەدەكتىگى بار ادامدار؛
قولدانىستاعى "قانداس" مارتەبەسى بار ادامدار؛
ءوڭىرارالىق قونىس اۋدارۋشىلار؛
تۇرمىسى تومەن وتباسى مۇشەلەرى؛
كوپبالالى وتباسى مۇشەسى (جۇبايى/زايىبى)؛
مۇگەدەكتىگى بار بالانى تاربيەلەپ وتىرعان ادام (جۇبايى/زايىبى)؛
اسىراۋشىسىنان ايىرىلۋ بويىنشا جاردەماقى الاتىندار.