الماتىداعى مەملەكەتتىك قۋىرشاق تەاترى قىزمەتكەرلەرىنىڭ جالاقىسى 30%-عا ءوستى، ال 16 مامان كانادا، رەسەي جانە قىرعىزستاننىڭ جەتەكشى تەاتر مەكتەپتەرىندە بىلىكتىلىگىن ارتتىردى.
سونداي-اق، 15 قىزمەتكەر مەملەكەتتىك باعدارلاما اياسىندا باسپانالى بولدى. بۇل شارالار تەاتر ترۋپپاسىنىڭ كاسىبي دەڭگەيىن كوتەرۋگە جانە ونىڭ حالىقارالىق ارەناداعى بەدەلىن نىعايتۋعا باعىتتالعان. بۇل تۋرالى تەاتر ديرەكتورى المات امانگەلدى وڭىرلىك كوممۋنيكاسيالار قىزمەتىندە وتكەن بريفينگ بارىسىندا مالىمدەدى، دەپ حابارلايدى aqshamnews.kz.
مەملەكەتتىك قۋىرشاق تەاترى – تالانتتى ارتىستەر مەن ماماندار ءۇشىن جاڭا مۇمكىندىكتەر الاڭى. 2024 جىلى 16 تەاتر قىزمەتكەرى كانادا، رەسەي جانە قىرعىزستاندا بىلىكتىلىگىن جەتىلدىرىپ، وزىق تاجىريبەلەردى مەڭگەردى.
«ءبىز تەاتردىڭ ەڭ باستى قۇندىلىعى – ونداعى ادامدار دەپ بىلەمىز. تەاتر قىزمەتكەرلەرىنىڭ كاسىبيلىك دەڭگەيى قانشالىقتى جوعارى بولسا، ءبىزدىڭ قويىلىمدارىمىز دا سونشالىقتى ساپالى ءارى اسەرلى بولماق»، – دەدى المات امانگەلدى.
تەاتر قىزمەتكەرلەرىنىڭ جالاقىسىنىڭ 30%-عا ءوسۋى – مادەنيەت سالاسىنداعى مەكەمەلەر ءۇشىن ايتارلىقتاي جەتىستىك. سونداي-اق، 15 قىزمەتكەر مەملەكەتتىك باعدارلاما اياسىندا تۇرعىن ۇيمەن قامتىلدى.
2023-2024 جىلدارى تەاتر عيماراتى اۋقىمدى جاڭعىرتۋدان ءوتتى. ساحنا، كورەرمەن زالى، گريم بولمەلەرى مەن گاردەروبتار تولىقتاي جاڭارتىلىپ، زاماناۋي دىبىس، جارىق جانە ساحنالىق تەحنولوگيالار ورناتىلدى. 2024 جىلى تەاتر فويەسىنىڭ قايتا جوندەۋدەن ءوتۋى اياقتالىپ، LED-ەكران مەن جاڭا جيھاز قويىلدى.