ولجاس بەكتەنوۆ قالدىقتاردى باسقارۋ سالاسىنداعى جوبالاردى ىسكە اسىرۋ جۇمىسىن كۇشەيتۋدى تاپسىردى
ق ر پرەمەر-مينيسترى ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا كوممۋنالدىق جانە وندىرىستىك قالدىقتاردى باسقارۋدىڭ جاي-كۇيى مەن الداعى جوسپارلارى قارالدى، دەپ حابارلايدى aqshamnews.kz.
ەكولوگيا جانە تابيعي رەسۋرستار مينيسترلىگىنىڭ مالىمەتى بويىنشا، ەلىمىزدە جىل سايىن 4،5 ملن توننادان استام كوممۋنالدىق قالدىقتار تۇزىلەدى، ال 2024 جىلى كادەگە جاراتۋ دەڭگەيى شامامەن 26%-دى قۇراعان. پرەمەر-مينيستر ەكولوگيالىق احۋالعا، حالىقتىڭ دەنساۋلىعى مەن تۇرمىس ساپاسىنا اسەر ەتەتىن قالدىقتاردى باسقارۋدىڭ ماڭىزدىلىعىن اتاپ ءوتتى.
«قالدىقتاردى باسقارۋ جۇيەسىن دامىتۋ ءۇشىن بىلتىر ەلىمىزدە ارنايى جەڭىلدىكپەن قارجىلاندىرۋ تەتىگى بەكىتىلگەن بولاتىن. بۇگىندە 94 جوبادان تۇراتىن پۋل جاساقتالدى. الايدا، ولاردى ىسكە اسىرۋ بارىسى مۇلدەم ماردىمسىز. بۇگىندە 67 جوبا قارالعان. سونىڭ 6-ۋى عانا 4 ملرد تەڭگە سوماسىندا قاراجاتپەن قامتاماسىز ەتىلگەن. بۇل جوبالاردى دايىنداۋ بارىسىندا اكىمدىكتەردىڭ تاراپىنان ۇيلەستىرۋ شارالارىنىڭ جەتكىلىكسىز ەكەنىن بىلدىرەدى. جوبالاردى ىسكە اسىرۋ، جابدىقتاردى جاڭارتۋ، جاڭا تەحنولوگيالاردى ەنگىزۋ بويىنشا بارىنشا بەلسەندى جۇمىس جۇرگىزۋ كەرەك»،— دەپ اتاپ ءوتتى ولجاس بەكتەنوۆ.