باس پروكۋراتۋرا جاۋاپ بەردى.
باس پروكۋروردىڭ ورىنباسارى اسەت چيندالييەۆ قايرات ساتىبالدى شارتتى تۇردە مەرزىمىنەن بۇرىن بوستاندىققا شىعا الادى ما دەگەن سۇراققا جاۋاپ بەردى، دەپ حابارلايدى Almaty-akshamy.kz
اسەت چيندالييەۆ كەز كەلگەن سوتتالعان ادام شارتتى تۇردە مەرزىمىنەن بۇرىن بوساتۋ تۋرالى ءوتىنىش بەرە الاتىنىن ايتتى.
"ءاربىر سوتتالعان ادامنىڭ ءوتىنىش جازۋىنا قۇقىعى بار. بىزدە تەك، كامەلەتكە تولماعاندارعا جىنىستىق قورلىق كورسەتكەن سوتتالعاندار ءۇشىن جانە تەرروريستىك جانە ەكسترەميستىك قىلمىستار جاساپ، قىلمىس كەزىندە ادام ولىمىنە اكەلگەن جايتتاردا شارتتى تۇردە مەرزىمىنەن بۇرىن بوساتۋعا شەكتەۋ بار. ال باسقا باپتار بويىنشا سوتتالعان تۇلعالار ءوتىنىش بەرە الادى"، - دەپ ءتۇسىندىردى باس پروكۋروردىڭ ورىنباسارى.
ول قايرات ساتىبالدىنى شارتتى تۇردە مەرزىمىنەن بۇرىن بوساتۋ تۋرالى سوڭعى شەشىمدى سوت شىعارۋى كەرەك ەكەنىن ءتۇسىندىردى.
"ساتىبالدى ۇلىنىڭ جازعانىنا بايلانىستى (ءوتىنىش – رەداكتوردىڭ ەسكەرتپەسى) مەرزىمىنەن بۇرىن قورىتىندى جاساماڭىز. كەز كەلگەن ادامنىڭ ءوتىنىش بەرۋگە قۇقىعى بار. بۇل ارىز سوتتا قارالادى. ءوتىنىش جازسا دا، ول بىردەن بوساتىلىپ، بوستاندىققا شىعادى دەگەندى بىلدىرمەيدى. سوت شارتتى تۇردە مەرزىمىنەن بۇرىن بوساتۋ نەمەسە باس تارتۋ تۋرالى شەشىم قابىلداۋى مۇمكىن. سوت تاجىريبەسىندە وتىنىشتەردى قاناعاتتاندىرماعان جاعدايلار ءجيى كەزدەسەدى"، - دەپ ءتۇسىندىردى اسەت چيندالييەۆ.
13 قازاندا قايرات ساتىبالدىنىڭ مەملەكەتكە 300 ميلليون دوللاردىڭ مۇلكىن قايتارعانى بەلگىلى بولدى.