الماتىدا ايگىلى اكتەر دجەكي چاننىڭ جۇرگەنى جايلى اقپارات الەۋمەتتىك جەلىدە قىزۋ تالقىلانىپ جاتىر، دەپ حابارلايدى اqshamnews.kz ءتىلشىسى.
23 قىركۇيەكتە تۇسىرىلگەن فوتو مەن بەينەجازبالاردا دجەكي چانعا ۇقسايتىن ادام الماتى حالىقارالىق اۋەجايىندا بايقالعان. جەلى قولدانۋشىلارى اكتەردى Salem Entertainment كومپانياسىنىڭ وكىلدەرىمەن بىرگە كورىپ قالعانىن ايتادى. سودان بەرى ونىڭ كەلۋ سەبەبى جايلى ءتۇرلى بولجام جاسالىپ جاتىر.
ەڭ كەڭ تاراعان نۇسقالاردىڭ ءبىرى - دجەكي چان قازاقستانعا جاڭا ءفيلمنىڭ ءتۇسىرىلىمى ءۇشىن كەلگەن بولۋى مۇمكىن. كەيبىر پىكىرلەرگە سۇيەنسەك، ول قازاقستاندىق مەدياكومپانيا Salem Entertainment-پەن ءىرى حالىقارالىق جوبادا سەرىكتەس بولۋى ىقتيمال. تاعى ءبىر نۇسقا بويىنشا، اكتەر الداعى ۋاقىتتا وتەتىن "قايرات" پەن "رەال مادريد" اراسىنداعى ءماچىنىڭ قۇرمەتتى قوناعى بولۋى مۇمكىن دەگەن جورامالدار ايتىلىپ جاتىر.
الايدا ازىرگە بۇل اقپاراتقا قاتىستى رەسمي راستاۋ جوق. Salem Entertainment كومپانياسى دا، فۋتبول كلۋبتارىنىڭ وكىلدەرى دە ەشقانداي پىكىر بىلدىرمەدى. الماتى اكىمدىگى مەن مادەنيەت مەكەمەلەرى تاراپىنان دا رەسمي تۇسىنىكتەمە بەرىلگەن جوق.
ايتا كەتەيىك، بۇعان دەيىن Salem Entertainment كومپانياسىنىڭ باس ديرەكتورى يگور ساي قازاقستاندا حالىقارالىق كينوجوبالار جۇزەگە اسىرىلىپ جاتقانىن، سونىڭ ىشىندە دجەكي چان جانە امەريكالىق پروديۋسەرلەرمەن بىرلەسكەن جۇمىستار بار ەكەنىن مالىمدەگەن ەدى. ونىڭ سوزىنشە، كومپانيا جىل سايىن ونداعان سەريال مەن بىرنەشە تولىقمەتراجدى فيلم تۇسىرەدى جانە شەتەلدىك سەرىكتەستەرمەن بايلانىسىن كەڭەيتىپ جاتىر.
دەگەنمەن ءدال ءقازىر دجەكي چاننىڭ الماتىعا كەلۋىنىڭ ناقتى ماقساتى بەلگىسىز. اقپاراتتى ەشبىر رەسمي دەرەككوز راستاماعاندىقتان، الەۋمەتتىك جەلىدەگى بولجامدار ازىرگە تەك قاۋەسەت كۇيىندە قالىپ وتىر.