Olimpbet–قازاقستان چەمپيوناتى ەكى ايلىق ۇزىلىستەن كەيىن قايتا جالعاسقاندا، الماتىلىق جانكۇيەرلەر سەنىمى سەتىنەگەندەي بولدى. شىمكەنتكە بارعان «قايرات» كومانداسى جەرگىلىكتى «ورداباسىدان» 1:2 ەسەبىمەن جەڭىلىپ قايتتى. العاشقى جارتى ساعاتتا ابدۋلاي دياكاتە مەن الەكساندر كلەششەنكو سوققان قوس دوپقا الماتىلىقتار ەكىنشى تايمدا حوسە كانتەنىڭ جالعىز دوبىمەن عانا جاۋاپ قايتاردى.
بۇل قۇربان بەردىيەۆتىڭ باس باپكەر رەتىندەگى العاشقى ماچى ەدى. چەمپيوناتتىڭ اياقتالۋىنا ەندى التى ويىن عانا قالدى. قالعان قارسىلاسىنىڭ ءبارىن جەڭگەن كۇننىڭ وزىندە، «قايرات» نەگىزگى قارسىلاستارى «توبىل» مەن «استاناعا» جەتە الماۋى مۇمكىن. بۇل تۋردا «استانا» سىرت الاڭدا «اقجايىقتى 1:0 ەسەبىمەن جەڭدى، «توبىل» «كاسپييدەن» 2:1 ەسەبىمەن باسىم ءتۇستى. ءقازىر «قايرات» پەن «توبىل» اراسىن 8، «قايرات» پەن «استانا» اراسىن 7 ۇپاي ءبولىپ تۇر. چەمپيوندىق مارەسىندە بۇل ايىرماشىلىقتار زور ءرول ويناۋى ىقتيمال.
وكىنىشكە قاراي، «ورداباسىمەن» كەزدەسۋدە ايبول ابىكەن الاڭنان (36 مينۋت) قۋىلدى. تالانتتى جاس فۋتبولشى بۇعان دەيىن ءساۋىر ايىنداعى «كاسپيي» – «قايرات» (1:1) ماچىنىڭ 35 مينۋتىندا ويىننان الاستاتىلعان ەدى. جالپى، «قايرات» بيىلعى چەمپيوناتتاعى ەڭ دورەكى كوماندا ەسەبىندە. ابىكەننەن بولەك، ۆاگنەر لاۆ، دەنيس پولياكوۆ، كامو وگانەسيان دا ءار كەزدەرى الاڭنان قۋىلعان. بەردىيەۆ ەڭ الدىمەن كوماندالىق تارتىپكە ءمان بەرەتىن مامان دەسەك تە، ونىڭ تىزگىن قاققان العاشقى ويىنىندا دا الماتىلىقتار دورەكىلىكتەن تانباي وتىر.
ەندى ماۋسىم سوڭىنا دەيىن «قايرات» «قىزىلجار» (ءوز الاڭىندا)، «شاحتەر» (قوناقتا)، «اقجايىق» (ءو)، «اقتوبە» (ق)، «استانا» (ءو)، «جەتىسۋ» (ق) كوماندالارىمەن كەزدەسەدى.
ەستەن سابالاق.