ءماجىلىس دەپۋتاتى ءۇنزيلا شاپاق Roblox ويىنىنا قاتىستى دابىل قاقتى. وسىعان بايلانىستى ول پرەمەر-مينيستردىڭ ورىنباسارى - جاساندى ينتەللەكت جانە سيفرلىق دامۋ ءمينيسترى جاسلان مادييەۆكە دەپۋتاتتىق ساۋال جولداپ، قازاقستاندا Roblox-قا قاتىستى زەرتتەۋ، باقىلاۋ جانە قۇقىقبۇزۋشىلىق ستاتيستيكاسى بار-جوعىن سۇرادى، - دەپ حابارلايدى aqshamnews.kz ءتىلشىسى.
قازاقستاندا بالالار مەن جاسوسپىرىمدەردىڭ ينتەرنەتتە وتكىزەتىن ۋاقىتى جىلدان جىلعا ۇلعايىپ بارادى. سونىڭ ىشىندە "Roblox" پلاتفورماسى ەرەكشە ترەندكە اينالعان: پايدالانۋشىلار ويىن قۇرادى، ۆيرتۋال الەمدە ەركىن سويلەسەدى، باسقا ويىنشىلارمەن تىكەلەي بايلانىسادى. دەپۋتاتتىڭ ساۋالىندا 2025 جىلعى اشىق دەرەككوزدەرگە سۇيەنىپ، پلاتفورمانىڭ كۇندەلىكتى بەلسەندى قولدانۋشىلارى 150 ميلليونعا جۋىق ەكەنى ايتىلادى. بۇل اۋديتوريانىڭ باسىم بولىگى - كامەلەتكە تولماعاندار.
دەپۋتات ءۇنزيلا شاپاق Roblox-تىڭ بالا پسيحيكاسىنا كەرى اسەرىنە قاتىستى الاڭداۋشىلىقتىڭ كوبەيگەنىن اتاپ ءوتتى: ۆيرتۋال تاۋەلدىلىك، اگرەسسيۆ مىنەز-قۇلىق، شىنايى ومىردەن الشاقتاۋ، جاس ەرەكشەلىگىنە ساي كەلمەيتىن كونتەنتكە تاپ بولۋ جاعدايلارى.
"ويىننان وت شىعار" دەمەكشى، بالالاردىڭ پسيحولوگيالىق دامۋىنا مۇنداي فاكتورلاردىڭ اسەرى ۇزاق مەرزىمدى تەرىس سالدارعا اكەلۋى ىقتيمال"، - دەيدى AMANAT فراكسياسىنىڭ دەپۋتاتى ءۇنزيلا شاپاق.
ساۋالدا ەڭ وزەكتى ءقاۋىپتىڭ ءبىرى رەتىندە بالالاردى ارباۋ مەن الاياقتىق سحەمالار سيپاتتالعان. دەپۋتات كەلتىرگەن سەناريي بويىنشا، قاسكويلەر الدىمەن ويىن ىشىندەگى چات ارقىلى بالانىڭ سەنىمىنە كىرەدى، كەيىن اڭگىمەنى باسقا مەسسەندجەرگە (مىسالى، Telegram) "اۋىستىرىپ"، قۇپيا كەزدەسۋگە شاقىرۋى مۇمكىن. ال الاياقتار "سىيلىق بەرەمىن" دەپ قىزىقتىرىپ، اتا-اناسىنىڭ كارتاسىنىڭ ءنومىرى مەن سمس-كودىن سۇراپ، اقشانى شەشىپ الاتىن جاعدايلار كەزدەسەدى.
"ولاردىڭ تاكتيكالارى قاراپايىم، الايدا دالدىك جاسالاتىنداي"، - دەپ سيپاتتايدى دەپۋتات ونلاين كەڭىستىكتەگى قاسكويلەردىڭ ارەكەتىن.
دەپۋتات كومپانيا "بالالارعا ەڭ ءقاۋىپسىز ورتا جاسايمىز" دەگەنىمەن، كونتەنت پەن كوممۋنيكاسيا اعىنىن تولىق باقىلاۋ قيىن ەكەنىن دە اتاپ وتەدى.
"سەكۋندىنا 50 مىڭنان اسا حابار اعىلىپ جاتقان ورتانى تولىق باقىلاۋ مۇمكىن ەمەس"، - دەلىنگەن ساۋالدا.
وسى ارادا دەپۋتات 2025 جىلعى 18 جەلتوقساندا قازاقستان رەسپۋبليكاسىنىڭ مادەنيەت جانە اقپارات ۆيسە-مينيسترى ەۆگەنيي كوچەتوۆتىڭ ۇستانىمىن دا ەسكە سالعان. ول كەزدە ۆيسە-مينيستر:
"ءبىز Roblox-تى بلوكتاۋ نەمەسە شەكتەۋ ماسەلەسىن قاراستىرمايمىز"، - دەگەن بولاتىن.
ءبىراق دەپۋتات مۇنداي پوزيسياعا قاراماستان، مەملەكەت بالانى زياندى اقپاراتتىق ورتادان قورعاۋعا مىندەتتى ەكەنىن ەسكە سالادى. ول "بالانىڭ قۇقىقتارى تۋرالى" زاڭنىڭ 36-بابى 1-تارماعىنا سىلتەمە جاساپ، مەملەكەتتىك ورگاندار مەن ۇيىمدار بالانى دەنساۋلىعىنا، يماندىلىق جانە رۋحاني دامۋىنا زيان كەلتىرەتىن ىقپالدان قورعاۋى ءتيىس ەكەنىن اتاپ وتەدى.
Roblox-قا قاتىستى شەكتەۋ شارالارىن ەنگىزگەن ەلدەر دە بار ەكەنى ايتىلادى: تۇركيا، كاتار، رەسەي، جۇڭگو، يران، سولتۇستىك كورەيا جانە وزگە مەملەكەتتەردە پلاتفورما بۇعاتتالعانى كورسەتىلگەن.
"…ءبىز تەك ەل ىشىندە قانداي دا ءبىر قايعىلى جاعداي بولعاننان كەيىن عانا ارەكەت ەتۋىمىز كەرەك پە؟"، - دەيدى دەپۋتات.
ءۇنزيلا شاپاق مينيسترلىككە ءتورت ناقتى سۇراق قويىپ وتىر:
-
قازاقستاندا Roblox-تىڭ بالالارعا پسيحولوگيالىق جانە الەۋمەتتىك اسەرىنە قاتىستى ارنايى زەرتتەۋ جۇرگىزىلدى مە؟
-
وزگە ەلدەردىڭ بۇعاتتاۋ تاجىريبەسىن ەسكەرە وتىرىپ، پلاتفورما قىزمەتىن شەكتەۋ نەمەسە قوسىمشا باقىلاۋ تەتىكتەرىن ەنگىزۋ قاراستىرىلا ما؟
-
بالالاردىڭ ينتەرنەتتەگى قاۋىپسىزدىگى ءۇشىن ناقتى قانداي الدىن الۋ شارالارى قابىلدانىپ جاتىر؟
-
ءىىم مەن باس پروكۋراتۋرادا ونلاين ويىن پلاتفورمالارى ارقىلى الاياقتىق، بوپسالاۋ سەكىلدى قۇقىق بۇزۋشىلىقتار تىركەلگەن بە؟
ساۋال اياعىندا دەپۋتات بۇل ماسەلەنىڭ قوعام، اتا-انا جانە بالالار قاۋىپسىزدىگى ءۇشىن اسا ماڭىزدى ەكەنىن اتاپ ءوتتى.