قاي ءوڭىردىڭ تۇرعىندارى التىن قۇيمالارىن كوپ ساتىپ الاتىنى بەلگىلى بولدى

التىن قۇيمالار سەنىمدى ينۆەستيسيا قۇرالى بولا الادى

ءساۋىر ايىندا ەكىنشى دەڭگەيلى بانكتەر مەن جەكەلەگەن بانكتىك ەمەس ايىرباستاۋ پۋنكتەرىندە جالپى سالماعى 61،3 كگ التىن قۇيماسى ساتىلدى. بۇل ناۋرىزداعى كورسەتكىشپەن سالىستىرعاندا 55،3% از، دەپ حابارلايدى Almaty-akshamy.kz  ۇلتتىق بانككە سىلتەمە جاساپ.

«ناۋرىزدا ساتىلىمنىڭ ۇلعايۋىنا قارجى نارىعىنداعى بەلگىسىزدىك پەن قۇبىلمالىلىق سەبەپ بولدى. حالىق قولداعى جيناعىن ساقتاپ قالۋ ءۇشىن بالامالى قۇرال رەتىندە التىنعا ينۆەستيسيالاۋعا مۇددەلى بولدى. ساۋىردە ۆاليۋتا نارىعىنداعى جاعدايدىڭ تۇراقتانۋىنا بايلانىستى قۇيما ساتىلىمىنىڭ تومەندەگەنى بايقالدى. دەگەنمەن ولشەمدى قۇيمالاردى ساتۋ كولەمى 2021 جىلعى ورتاشا ايلىق ساتۋ كولەمىنەن 37،3%-عا جوعارى (2 694 دانا) بولدى. ۇلتتىق بانك 2017 جىلى حالىققا تازارتىلعان التىن قۇيمالاردى ساتۋ جانە ساتىپ الۋ باعدارلاماسىن ىسكە قوستى. باعدارلاما قولعا الىنعالى جالپى سالماعى 3،1 تونناعا جۋىق 91 229 التىن قۇيما ساتىلدى»، - دەلىنگەن حابارلامادا.

ايتا كەتسەك، التىن قۇيمالار بەس ءتۇرلى سالماقتا ۇسىنىلادى: 5، 10، 20، 50 جانە 100 گ. ساتىپ الۋشىلار اراسىندا وتە جوعارى سۇرانىسقا يە ءتۇرى – 10 گرامدىق التىن قۇيما.

جالپى ساتىلعان قۇيمالار اراسىندا ونىڭ ۇلەسى – 26%، ياعني، 23 799 دانا. ودان كەيىن 20 گرامدىق قۇيما سۇرانىسقا يە، 19 376 دانا (21%)، 5 گرامدىق قۇيمادان 18 599 دانا (21%)، 100 گرامدىق قۇيمادان 18 197 دانا (20%)، 50 گرامدىق قۇيمادان 11 258 دانا (12%) ساتىلدى. التىن قۇيمالار الماتى، نۇر-سۇلتان جانە اتىراۋ قالالارىندا كوپ ساتىلادى.

التىن قۇيمالار سەنىمدى ينۆەستيسيا قۇرالى بولا الادى. التىن قۇيمالار نارىعىنداعى وتىمدىلىكتىڭ باستى كەپىلى – بانك پەن بانكتىك ەمەس ايىرباستاۋ پۋنكتەرى كليەنتكە اقشانى سول كۇنى تولەي وتىرىپ، التىن قۇيمالاردى كەرى ساتىپ الا الادى.