قاي ءوڭىردىڭ باعاسى جۇگەنسىز كەتكەن؟

وسى سۇراققا ۇلتتىق بانك جاۋاپ بەردى.

ەلىمىزدەگى ازىق-تۇلىك باعاسى ورەسكەل قىمباتتاعان وڭىرلەردى ۇلتتىق بانك اتاپ كورسەتتى، دەپ حابارلايدى Almaty-akshamy.kz

«جالپى ەل بويىنشا ازىق-تۇلىك باعاسى ءبىر ايدا 0،7% ءوستى. اسىرەسە شىعىس قازاقستان (1،2%)، پاۆلودار جانە سولتۇستىك قازاقستان (1،1%) وبلىستارىندا قىمباتشىلىقتىڭ قارقىنى قاتتى. جەمىس پەن كوكونىس باعاسى1،5% قىمباتتاعان. اسىرەسە قىرىققاباتتىڭ باعاسى الماتى قالاسىندا 17،7% ارتتى. ال جۇمىرتقانىڭ باعاسى الماتىدان باسقا وڭىرلەردىڭ بارىندە كوتەرىلدى. ەڭ جوعارعى ءوسىم اتىراۋ وبلىسىندا تىركەلدى (30،2%)»، - دەپ جازىلعان ۇلتتىق بانكتىڭ ينفلياسيا تۋرالى ساراپتاماسىندا.

رەسمي مالىمەتتە، ازىق-تۇلىك تاۋارىن اۋىزدىقسىز جىبەرگەن شىعىس قازاقستان وبلىسىنداعى احۋال جەكە تالدانعان.

«وڭىردە جوعارعى سۇرىپتى بيداي ۇنىنان پىسىرىلگەن نان 6،2%، قاراقۇمىق جارماسى 3،3%، جەمىس پەن كوكەنىس 3،4% قىمباتتادى. بۇل تاۋارلاردىڭ رەسپۋبليكالىق ورتاشا باعاسى 0،9%، 0،5% جانە 1،5% كوتەرىلگەن»، - دەپ جازادى ۇلتتىق بانك ماماندارى. 

شىعىس قازاقستاننان كەيىنگى ورىندا تۇرعان پاۆلودار وبلىسىندا 1-سۇرىپتى بيداي ۇنىنان پىسىرىلگەن نان 5،1%، قارا بيداي نانى 2،9% قىمباتتاعان. ال سولتۇستىك قازاقستان جانە اقتوبە وبلىستارىندا ەت پەن ەت ونىمدەرى 2 جانە 1،3% قىمباتتاعان.

«اقتوبە وبلىسىندا قۇس ەتى ءبىر ايدا 8،6% قىمباتتادى. سولتۇستىك قازاقستان وبلىسىندا جىلقى ەتى 2،9%، ال قوي ەتى 3،8% قىمباتتادى. ال رەسپۋبليكا بويىنشا بۇل ونىمدەردىڭ باعاسى 0،3 جانە 0،4% عانا كوتەرىلگەن»، - دەلىنگەن ۇلتتىق بانك تالداۋىندا.