قۇجاتتاردى كەز كەلگەن جوو ارقىلى تاپسىرۋعا بولادى.
قابىلداۋ كوميسسيالارىنىڭ جۇمىسى دەمالىس كۇنى دە جالعاسىن تاپتى، دەپ حابارلايدى Almaty-akshamy.kz
قۇجاتتاردى قابىلداۋ
سونىمەن قاتار عىلىم جانە جوعارى ءبىلىم مينيسترلىگى ءبىلىم بەرۋ گرانتتارىن تاعايىنداۋ كونكۋرسىنا قۇجاتتاردى قابىلداۋ ەGov ارقىلى ونلاين فورماتتا جۇزەگە اسىرىلاتىندىعىن ەستەرىڭىزگە سالىپ وتىر. سونداي-اق جوو-دا ۆيرتۋالدى قابىلداۋ كوميسسيالارى جۇمىس ىستەيدى.
قانشا گرانت ءبولىندى؟
“بيىل باكالاۆرياتقا ءتۇسۋ ءۇشىن 79 مىڭعا جۋىق گرانت ءبولىنىپ وتىر. گرانتتاردىڭ باسىم بولىگى «ينجەنەرلىك، وڭدەۋ، قۇرىلىس سالالارى» ءبىلىم بەرۋ باعدارلاما توپتارىنا ءبولىندى، ولاردىڭ سانى 19 344 گرانتتى قۇرايدى. ال «پەداگوگيكالىق عىلىمدارعا» – 13 735 گرانت، «اقپاراتتىق-كوممۋنيكاسيالىق تەحنولوگيالار» سالاسىنا – 10 903 گرانت، «جاراتىلىستانۋ عىلىمدارى، ماتەماتيكا جانە ستاتيستيكا» باعىتىنا – 8 288 گرانت تيەسىلى”، دەلىنگەن مينسترلىكتىڭ حابارلاماسىندا.
العاش رەت ءىشىنارا وقۋ اقىسى بار سارالانعان گرانتتار ەنگىزىلدى. «پەداگوگيكالىق عىلىمدار» جانە «الەۋمەتتىك عىلىمدار، جۋرناليستيكا جانە اقپارات» باعىتتارى بويىنشا 150 سارالانعان گرانتتان بولىنگەن.
“سەرپىن” باعدارلاماسى
سونداي-اق «سەرپىن» باعدارلاماسى ارقىلى تۇسۋشىلەرگە 3 903 گرانت بولىنگەن. گرانتتار تىزىمىندە 5 000 حالىق تىعىز قونىستانعان جانە باتىس وڭىرلەردىڭ جاستارىن جەتەكشى جوعارى وقۋ ورىندارىندا وقىتۋ ءۇشىن ماقساتتى ءبىلىم بەرۋ گرانتى بار.
ەسكە سالا كەتسەك، 139 مىڭعا جۋىق تالاپكەر ۇبت-دا شەكتى بالل جيناعان، ولار گرانت كونكۋرسىنا قاتىسا الادى. ءبىلىم بەرۋ گرانتى يەگەرلەرىنىڭ ءتىزىمى 10 تامىزعا دەيىن جاريالانادى.