10 مىڭنان استام مەملەكەتتىك قىزمەتشى مەن كۆازيمەملەكەتتىك سەكتوردىڭ قىزمەتكەرى اكىمشىلىك جانە تارتىپتىك جاۋاپقا تارتىلعان
مەملەكەت باسشىسى باس پروكۋرور بەرىك اسىلوۆتى قابىلدادى. پرەزيدەنتكە ەلىمىزدە زاڭدىلىقتىڭ ساقتالۋ جاعدايى جانە قاداعالاۋ قىزمەتىنىڭ ماڭىزدى باعىتتارىنا قاتىستى جۇمىستاردىڭ نەگىزگى قورىتىندىسى جونىندە ەسەپ بەرىلدى، دەپ حابارلايدى Almaty-akshamy.kz اقورداعا سىلتەمە جاساپ.
بەرىك اسىلوۆتىڭ ايتۋىنشا، جىل باسىنان بەرى پروكۋراتۋرا قابىلداعان شارالاردىڭ ناتيجەسىندە 7 مىڭنان استام زاڭ بۇزۋشىلىق جويىلعان. ونىڭ كوبى مەملەكەتتىك ساتىپ الۋلار، دەنساۋلىق ساقتاۋ، ەكولوگيا جانە بالالاردىڭ قۇقىقتارىن قورعاۋ سالالارىندا انىقتالعان. 10 مىڭنان استام مەملەكەتتىك قىزمەتشى مەن كۆازيمەملەكەتتىك سەكتوردىڭ قىزمەتكەرى اكىمشىلىك جانە تارتىپتىك جاۋاپقا تارتىلعان. پروكۋراتۋرانىڭ ارالاسۋىنان كەيىن مەملەكەتكە 8،4 ملرد تەڭگە قايتارىلعان، 177 مىڭنان استام ەڭبەك قۇقىعى قالپىنا كەلتىرىلگەن، سونداي-اق 1 ملرد تەڭگەدەن استام جالاقى قارىزى وتەلگەن.
پرەزيدەنتكە كريمينوگەندىك جاعدايلار جانە ازاماتتاردىڭ كونستيتۋسيالىق قۇقىقتارىن قامتاماسىز ەتۋ ءۇشىن قىلمىستىق-قۇقىقتىق سالادا قابىلدانىپ جاتقان شارالار جونىندە اقپارات بەرىلدى. پروكۋرورلار زاڭسىز ۇستالعان 596 ازاماتتى بوساتتى. 542 ازاماتقا قاتىستى شەشىمدى قايتا قاراۋ ۇسىنىلدى، سونىڭ ىشىندە سوتتالعان 90 ادامنىڭ جاعدايى جاقسارتىلىپ، 9 ادام اقتالدى.
قاسىم-جومارت توقايەۆقا قىلمىستىق پروسەستىڭ جاڭا ءۇش بۋىندى مودەلىنىڭ ەنگىزىلۋ بارىسى جونىندە ارنايى باياندالدى. بيىل پروكۋرورلار 152 مىڭ پروسەسسۋالدىق شەشىمدى قايتا ەلەكتەن وتكىزدى. سونىڭ ىشىندە 11،5 مىڭنان استام قاۋلى زاڭسىز دەپ تانىلدى. 1 مىڭعا جۋىق ازاماتتىڭ قىلمىستىق پروسەسكە نەگىزسىز تارتىلۋىنا جول بەرىلمەدى.
بەرىك اسىلوۆ مەملەكەت باسشىسىنا بيزنەستى قورعاۋ، اسىرەسە زاڭسىز قىلمىستىق قۋدالاۋعا جول بەرمەۋ ءۇشىن قابىلدانىپ جاتقان شارالار جونىندە جان-جاقتى باياندادى. پرەزيدەنتتىڭ تاپسىرماسى بويىنشا پروكۋرورلار كاسىپكەرلەرگە قاتىستى قوزعالعان بارلىق قىلمىستىق ءىستىڭ زاڭدىلىعىن تەكسەرىپ جاتىر. جۇرگىزىلگەن تەكسەرىستەر ناتيجەسىندە وندىرىستەگى 378 ءىستىڭ 36-سى توقتاتىلدى. بيزنەسكە كەدەرگى جاساۋ، قۇقىق قورعاۋ جانە باسقا دا مەملەكەتتىك ورگان وكىلدەرى تاراپىنان قىزمەتىن اسىرا پايدالانۋ فاكتىلەرى بويىنشا 12 سوتقا دەيىنگى تەرگەۋ امالدارى جۇرگىزىلىپ جاتىر. ماتەريالداردى تەكسەرۋ ءالى دە جالعاسادى.
كاسىپكەرلەردىڭ قىلمىستىق پروسەسكە نەگىزسىز تارتىلۋىن بولدىرماۋ ماقساتىندا ۇيىمداستىرۋشىلىق جانە زاڭنامالىق شارالار كەشەنى ازىرلەنەدى.
مەملەكەت باسشىسىنا قاڭتار وقيعاسىنا بايلانىستى تەرگەۋ امالدارىنىڭ بارىسى تۋرالى ارنايى باياندالدى. بۇگىندە 489 ازاماتقا قاتىستى ءىس سوتقا جولدانعان. 331 ادام، نەگىزىنەن ۇرلىق، توناۋشىلىق، قارۋ ساقتاۋ جانە ۇرلاۋ دەرەكتەرى بويىنشا سوتتالعان. تەك 23 ادامعا قاتىستى باس بوستاندىعىنان ايىرۋ تۋرالى ناقتى شەشىم شىققان، قالعاندارىنا جەڭىل جازا كەسىلگەن. رۇقسات ەتىلمەگەن تەرگەۋ امالدارى مەن جاپپاي تارتىپسىزدىك كەزىندە قازا بولعاندارعا قاتىستى ىستەر ەرەكشە باقىلاۋعا الىنعان.
قاسىم-جومارت توقايەۆ قاڭتار وقيعاسىنىڭ سەبەبىن جان-جاقتى تەكسەرىپ، وعان كىنالىلەردى وبەكتيۆتى تۇردە انىقتاۋ، سونداي-اق تەرگەۋ قورىتىندىسى جونىندە جۇرتشىلىققا تۇراقتى اقپارات بەرۋ قاجەت ەكەنىن اتاپ ءوتتى. بۇدان بولەك، پرەزيدەنت ەلىمىزدىڭ الەۋمەتتىك جانە ەكونوميكالىق ءومىرىنىڭ بارلىق سالاسىندا زاڭدىلىقتى قامتاماسىز ەتۋدىڭ اسا ماڭىزدى ەكەنىن ايتتى.