الماتى قالاسىنىڭ تۇركسىب اۋداندىق سوتىندا ءوز قىزمەتتىك مىندەتتەرىن ورىنداۋ كەزىندە بيلىك وكىلدەرىنە ءتىل تيگىزدى دەگەن ايىپپەن تورەعالي تورەالىگە قاتىستى قىلمىستىق ءىس قارالدى.
«سوت وسى جىلدىڭ 14 ماۋسىمىندا مايلين كوشەسىندە «Lexus» ماركالى اۆتوكولىك توقتاتىلعانىن انىقتادى. جۇرگىزۋشى ا. پوليسيا قىزمەتكەرلەرىنىڭ زاڭدى ءارى بىرنەشە رەت ايتقان تالابىن ورىنداۋدان ۇزىلدى-كەسىلدى باس تارتىپ، پوليسيا قىزمەتكەرلەرىنە بالاعات سوزدەر ايتىپ، قارسىلىق تانىتقان. وسىلايشا ول ءوز قىزمەتتىك مىندەتتەرىن ورىنداۋ بارىسىنداعى بيلىك وكىلدەرىن قورلادى»، – دەلىنگەن سوت مالىمەتىندە.
ايىپتالۋشىنىڭ كىناسى ءىس بويىنشا جينالعان ماتەريالدار ارقىلى دالەلدەندى: جابىرلەنۋشىلەر مەن كۋاگەرلەردىڭ جاۋاپتارى، ۆيدەوجازبا جانە تاعى باسقاسى.
پروكۋرور ت.تورەالىنى كىنالى دەپ تانۋدى جانە وعان 80 ساعاتقا دەيىنگى مەرزىمگە قوعامدىق جۇمىستارعا تارتۋ تۇرىندە جازا تاعايىنداۋدى سۇرادى. جابىرلەنۋشىلەر ونىڭ زاڭعا سايكەس جازالانۋىن تالاپ ەتتى.
ال ايىپتالۋشى ءوز كىناسىن مويىنداعان جوق.
«سوت جازا تاعايىنداۋ كەزىندە ءىس بويىنشا ايىپتى جەڭىلدەتەتىن (5 كىشكەنتاي بالاسىنىڭ بولۋى) جانە اۋىرلاتاتىن (ەسىرتكىگە ەلىتكەن كۇيدە بولۋى) ءمان-جايلاردى نازارعا الدى. سوت قاۋلىسىمەن ا. جوعارىدا اتالعان قۇقىق بۇزۋشىلىق ءۇشىن كىنالى دەپ تانىلدى جانە وعان 40 ساعاتقا دەيىن قوعامدىق جۇمىستارعا تارتۋ تۇرىندەگى جازا تاعايىندالدى»، – دەپ اتاپ ءوتتى قالالىق سوتتىڭ باسپا ءسوز قىزمەتىنەن.
سوت قاۋلىسى زاڭدى كۇشىنە ەنگەن جوق.