گۇلميرا ساتىبالدى ءوز ءىسىن قاراپ جاتقان سۋدياعا قارسىلىق تانىتتى
پروكۋرور وليگارح قايرات ساتىبالدىنىڭ بۇرىنعى ايەلى گۇلميرا ساتىبالدىنى سەگىز جىلعا باس بوستاندىعىنان ايىرۋدى سۇرادى، دەپ حابارلايدى Almaty-akshamy.kz Zakon.kz-كە سىلتەمە جاساپ.
ول گۇلميرا ساتىبالدىنى قىلمىستىق قۇقىق بۇزۋشىلىق جاساعانى ءۇشىن كىنالى دەپ تانۋدى سۇرادى.
"ساتىبالدىعا قازاقستان رەسپۋبليكاسى قىلمىستىق كودەكسىنىڭ 389-بابىنىڭ 4-بولىگى بويىنشا مۇلكىن تاركىلەۋسىز 6 جىلعا باس بوستاندىعىنان ايىرۋ جازاسى، ق ر قك 28-بابىنىڭ 3-بولىگى بويىنشا 8 جىلعا باس بوستاندىعىنان ايىرۋ جازاسى تاعايىندالسىن"، – دەدى پروكۋرور ازامات سارسەمبايەۆ.
21 ءساۋىر كۇنى گۇلميرا ساتىبالدى سوتتا سۇراق-جاۋاپ الۋ كەزىندە ءوز كىناسىن ءىشىنارا مويىندايتىنىن مالىمدەدى.
بايقوڭىر اۋدانىنىڭ №2 سوتىندا سوتتالۋشى گۇلميرا ساتىبالدى ءوز ءىسىن قاراپ جاتقان سۋدياعا قارسىلىق تانىتتى. قورعاۋشى تاراپ وكىلدەرى سۋديا جۇمىسىنا قارسىلىقتى جاريالاي وتىرىپ، گۇلميرا ساتىبالدى ق ر قىجك-نىڭ 23-بابىنا سۇيەنەتىنىن جەتكىزدى. بۇل باپتا سوت وبەكتيۆتىلىك پەن بەيتاراپتىلىقتى ساقتاي وتىرىپ، تاراپتاردىڭ ءىس جۇرگىزۋ مىندەتتەرىن ورىنداۋى جانە ولارعا بەرىلگەن قۇقىقتاردى جۇزەگە اسىرۋى ءۇشىن قاجەتتى جاعدايلار جاساۋعا مىندەتتى ەكەنى كورسەتىلگەن. ولار سۋديا كەمەڭگەر يماشيەۆ وزدەرىنە اتالعان جاعدايدى جاسامادى دەپ مالىمدەدى.