Cوت تىيىم سالعان ۇيىمدارعا ەرمەۋگە شاقىردى.
قازاقستان رەسپۋبليكاسى باس پروكۋرورىنىڭ ورىنباسارى جاندوس ومىرالييەۆ زاڭسىز ميتينگىلەردى وتكىزۋگە قاتىستى قازاقستاندىقتارعا ۇندەۋ جاسادى، دەپ حابارلايدى Almaty-akshamy.kz.
"الەۋمەتتىك جەلىلەردە سوت تىيىم سالعان ۇيىمنىڭ 2022 جىلعى 20 قاراشادا زاڭسىز ميتينگىلەردى وتكىزۋگە، قاتىسۋعا جانە وزگە دە قۇقىققا قايشى ارەكەتتەر جاساۋعا شاقىرۋلارى تاراتىلۋدا. ۇلتتىق جانە حالىقارالىق قۇقىققا سايكەس، تەرروريزمدى نەمەسە زورلىق-زومبىلىق ەكسترەميزمدى ناسيحاتتايتىن وسىنداي ۇيىمداردىڭ كەز كەلگەن قىزمەتىنە تىيىم سالىنعانىن اتاپ وتەمىن"، - دەپ جازدى جاندوس ومىرالييەۆ.
ونىڭ ايتۋىنشا، قازاقستان رەسپۋبليكاسىندا بەيبىت جينالىستار، ميتينگىلەر، شەرۋلەر، پيكەتتەر مەن دەمونستراسيالار ۇيىمداستىرۋ جانە وتكىزۋ ءتارتىبى تۋرالى» زاڭمەن (5-باپتىڭ 6-تارماعى، 14-باپتىڭ 1-تارماعىنىڭ 2-تارماقشاسى، بۇدان ءارى - زاڭ) ولاردىڭ وسىنداي اكسيالاردى ۇيىمداستىرۋىنا جول بەرمەۋ بەكىتىلگەن. ەگەر اكسيالار مەملەكەتتىڭ قاۋىپسىزدىگىنە نۇقسان كەلتىرۋگە، باسقا دا قىلمىستىق ارەكەتتەر جاساۋعا باعىتتالعان بولسا، ولاردى جۇرگىزۋگە دە جول بەرىلمەيدى (زاڭنىڭ 14-بابىنىڭ 1-تارماعىنىڭ 1-تارماقشاسى). بۇل بەيبىت جينالىستاردى ۇيىمداستىرۋ مەن وتكىزۋدىڭ نەگىزگى قاعيداتتارىنىڭ ءبىرى - ولاردىڭ زورلىق-زومبىلىقسىز سيپاتى مەن زاڭدىلىعىنا، سونداي-اق قوعامدىق ءتارتىپتى، دەنساۋلىقتى ساقتاۋدى، باسقا ادامداردىڭ قۇقىقتارى مەن بوستاندىقتارىن قورعاۋدى قامتاماسىز ەتۋگە بايلانىستى (زاڭنىڭ 3-بابى). اتالعان زاڭسىز ارەكەتتەردى جاساۋمەن ۇشتاسقان تىيىم سالىنعان ۇيىمداردىڭ شاقىرۋلارى، ۇيىمداستىرۋى جانە ولارمەن ۇيىمداستىرىلعان اكسيالارعا قاتىسقانى ءۇشىن اكىمشىلىك (اقبتك-نىڭ 488-بابى) جانە قىلمىستىق جاۋاپتىلىق (قك-نىڭ 179-بابى (بيلىكتى كۇشتەپ باسىپ الۋعا شاقىرۋ)، 405-بابى (سوت تىيىم سالعان ۇيىمداردىڭ قىزمەتىنە قاتىسۋ)) كوزدەلگەن. قۇقىق قورعاۋ ورگاندارى قازاقستان رەسپۋبليكاسىنىڭ زاڭناماسىن بۇزاتىن ادامدارعا زاڭدا كوزدەلگەن شارالاردى قابىلدايدى جانە كەز كەلگەن قۇقىقبۇزۋشىلىقتاردىڭ جولىن كەسەدى.
اتاپ ايتقاندا، اعىمداعى جىلعى 17 قاراشادا ۇلتتىق قاۋىپسىزدىك كوميتەتىنىڭ قىزمەتكەرلەرى پروكۋراتۋرا ورگاندارىنىڭ ىقپالداستىعىمەن جەتى ادامنان تۇراتىن قىلمىستىق توپ قىزمەتىنىڭ جولىن كەستى.
ولاردىڭ بيلىكتى كۇشتەپ باسىپ الۋ ماقساتىندا قارۋ-جاراق پەن تۇتاندىرعىش قوسپالاردى پايدالانا وتىرىپ، جاپپاي تارتىپسىزدىكتەر مەن مەملەكەتتىك جانە قۇقىق قورعاۋ ورگاندارىنىڭ عيماراتتارىنا، تىرشىلىكتى قامتاماسىز ەتۋ وبەكتىلەرىنە شابۋىلدار جاساۋدى، ولاردىڭ قىزمەتكەرلەرىن ءولتىرۋدى جوسپارلاۋعا، سونداي-اق دايىنداۋعا قاتىستىلىعى تۋرالى قۇجاتتىق دالەلدەر الىندى.
سونداي-اق ۇستالعان ادامداردىڭ تۇرعىلىقتى جەرى بويىنشا زاتتاي دالەلدەمەلەر دە الىندى. قىلمىستىق كودەكستىڭ 179-بابىنىڭ 2-بولىگى (ادامدار توبىنىڭ بيلىكتى كۇشتەپ باسىپ الۋىنا جاريا تۇردە شاقىرۋ) جانە 272-بابىنىڭ 1-بولىگى (جاپپاي تارتىپسىزدىكتەردى ۇيىمداستىرۋ) بويىنشا سوتقا دەيىنگى تەرگەپ-تەكسەرۋ باستالدى. وسىعان بايلانىستى باس پروكۋراتۋرا ازاماتتاردى سوت تىيىم سالعان ۇيىمدار مەن ولاردىڭ ارتىندا تۇرعان ادامداردىڭ ارانداتۋىنا ەرمەۋدى، ولاردىڭ زاڭسىز ارەكەتتەرىنە قاتىسۋدان باس تارتۋدى جانە زاڭدى مۇلتىكسىز ساقتاۋدى الدىن الا ەسكەرتەدى.
ەسكە سالساق، ۇلتتىق قاۋىپسىزدىك كوميتەتى كەشە 20 قاراشادا جاپپاي تارتىپسىزدىكتەردى جوسپارلاپ، ۇيىمداستىرماقشى بولعان قىلمىستىق توپتىڭ جولىن كەسكەن ەدى.